काठमाडौँ । श्रम संस्कृति पार्टीका अध्यक्ष हर्क साम्पाङले सुनसरी निर्वाचन क्षेत्र नम्बर १ बाट प्रतिनिधिसभा निर्वाचनका लागि मनोनयन दर्ता गराएका छन्।
फागुन २१ गते हुने निर्वाचनका लागि मंगलबार उनले निर्वाचन अधिकृतको कार्यालयमा औपचारिक रूपमा उम्मेदवारी दर्ता गरेका हुन्।
हालसम्म सुनसरी–१ बाट चार जना उम्मेदवारले मनोनयन दर्ता गराइसकेका छन्। उनीहरूमध्ये नेपाल मजदुर किसान पार्टीबाट महेश श्रेष्ठ, स्वतन्त्र उम्मेदवार देउमान लिम्बू, मंगोल नेशनल अर्गनाइजेसनबाट राजेन्द्र गुरुङ, र श्रम संस्कृति पार्टीबाट हर्क साम्पाङ रहेका छन्।
निर्वाचन अधिकृतका अनुसार मनोनयन दर्ता प्रक्रिया बिहान १० बजेदेखि बेलुका ५ बजेसम्म सञ्चालन भइरहेको छ र अन्तिम समयसम्म थप उम्मेदवारहरूले पनि उम्मेदवारी दर्ता गर्ने सम्भावना रहेको छ।
