काठमाडौं । जाडो मौसम सुरु भएसँगै चिसो बढ्नुका कारण स्वास्थ्यसम्बन्धी समस्या पनि बढ्ने गर्छन्। रुघाखोकी, ज्वरो, जोर्नी दुख्ने, छाला सुख्खा हुनेदेखि लिएर हृदय र श्वासप्रश्वाससम्बन्धी समस्या जाडोमा बढी देखिन्छन्। चिकित्सकहरूका अनुसार केही सामान्य सावधानी अपनाएमा जाडो मौसममा स्वास्थ्य जोगाउन सकिन्छ।
जाडोमा देखिने प्रमुख समस्या
रुघाखोकी, फ्लु र ज्वरो
घाँटी दुख्ने र खोकी
छाला सुख्खा र चिलाउने
रक्तचाप र मुटुसम्बन्धी समस्या
जोर्नी तथा मांशपेशी दुख्ने
जाडोमा अपनाउनुपर्ने स्वास्थ्य हेरचाह
१. न्यानो कपडा लगाउने
चिसोबाट जोगिन तह–तहमा न्यानो कपडा लगाउनुपर्छ। टाउको, कान, घाँटी र खुट्टा राम्रोसँग ढाक्नु महत्त्वपूर्ण हुन्छ।
२. तातो र पोषणयुक्त खानपान
सूप, झोलिलो खाना, दाल, सागसब्जी, अदुवा, लसुन, बेसारजस्ता तातो प्रकृतिका खानेकुरा सेवन गर्नुपर्छ। फलफूल पनि नियमित खानु आवश्यक छ।
३. पर्याप्त पानी पिउने
जाडोमा तिर्खा कम लागे पनि शरीरलाई पानी चाहिन्छ। मनतातो वा साधारण पानी नियमित पिउनुपर्छ।
४. नियमित व्यायाम र घाम ताप्ने
हल्का व्यायामले शरीर न्यानो राख्छ। बिहानको घाम ताप्दा भिटामिन ‘डी’ प्राप्त हुन्छ, जसले हड्डी र रोग प्रतिरोधात्मक क्षमता बलियो बनाउँछ।
५. सरसफाइमा ध्यान दिने
हात साबुनपानीले धुने, मास्क प्रयोग गर्ने र भीडभाडबाट जोगिने हो भने संक्रमणको जोखिम कम हुन्छ।
६. छालाको हेरचाह
छाला सुख्खा नहोस् भन्नका लागि मोइस्चराइजर वा तेल प्रयोग गर्नुपर्छ। नुहाउँदा धेरै तातो पानी प्रयोग गर्नुहुँदैन।
७. बालबालिका र वृद्धको विशेष ख्याल
बालबालिका र ज्येष्ठ नागरिक चिसोप्रति बढी संवेदनशील हुने भएकाले उनीहरूलाई विशेष रूपमा न्यानो राख्नुपर्छ।
