काठमाडौं: चीनमा रहेका नेपाली विद्यार्थीहरु प्राणघातक नाेवल काेराेना भाइरसकाे संक्रमणबाट सुरक्षित रहेको नेपालस्थित चिनियाँ राजदूत हाउ याङ्कीले बताएकी छिन् । नेपालले ती विद्यार्थीकाे उद्धार गर्ने बताइ रहेकाे बेला चिनियाँ राजदूतकाे उक्त भनाइ सार्वजनिक भएकाे हाे । तर यदि उनीहरुलाई उद्धार गर्ने हो भने विमानस्थल क्वारेन्टाइन, महामारी रोकथामको तयारी पूरा गर्न र विश्व स्वास्थ्य संगठन (डब्यूएचओ)का नेपाल प्रतिनिधिसँग परामर्श गर्न उहाँले सुझाव दिएकी छिन् ।
मंगलबार राजधानीमा केही सञ्चारकर्मीसँग कुरा गर्दै राजदूत याङ्कीले चीनमा रहेका नेपाली नागरिकहरु सुरक्षित रहेको बताएकी हुन् ।
उहानमा रहेका नेपाली विद्यार्थीहरुको समस्या समाधान गर्न बेइजिङस्थित नेपाली दूताबाससँग चिनियाँ विदेश मन्त्रालयको सम्वन्धित विभाग नियमित सम्पर्कमा रहेको भन्दै राजदूत याङ्कीले भनिन्, ‘हुवेई प्रान्त र उहान नगरपालिकाका विदेश मामिला कार्यालय र सम्वन्धित विश्वविद्यालय उनीहरुलाई राम्रो बन्दोबस्ती उपलब्ध गराउने प्रयासमा छ ।’
महामारी रोकथामका लागि केही रोक लगाउनु स्वाभाविक भएको उनले बताइन् । केही नेपालीलाई चीनमा रोकिएको विषयमा सोधिएको प्रश्नमा उनले विमानस्थलमा चेकजाँच गर्दा उनीहरुको तापक्रम सामान्यभन्दा बढी पाएको बताइन् । उनले भनिन्, ‘यो उनीहरु स्वयं र अरुका लागि जरुरी छ ।’
राजदूत याङ्कीले उहानमा रहेका नेपालीहरुलाई उद्धार गर्ने विषय आफूले पनि सुनेको बताइन् । यसका लागि कूटनीतिक माध्यमबाट कुराकानी गर्नुपर्ने भन्दै उनले भनिन्, ‘यदि नेपालले आफ्ना नागरिकलाई उद्धार गर्न चाहन्छ भने हाम्रो सल्लाह छ कि नेपाली पक्ष विमानस्थल क्वारेन्टाइन, महामारी रोकथाम तथा नियन्त्रणमा पूर्ण तयार रहनुपर्छ र महामारी रोकथामका लागि डब्लूएचओका प्रतिनिधिसँग सल्लाह गर्नुपर्छ ।’
चीनकाे हुवेइ प्रान्त र खासगरी हुवेइकाे राजधानी शहर उहानबाट फैलिएकाे नाेवल काेराेना भाइरसबाट मंगलबारसम्म ४२५ जनाकाे मृत्यु भइसकेकाे छ भने २० हजारभन्दा बढी व्यक्ति बिरामी भएका छन् । चीनमा यस महामारी थप क्षेत्रमा फैलन नदिन युद्धस्तरमा काम भइरहेकाे समाचार अाएकाे छ, तर दिनहुँ ५० जनाभन्दा बढीकाे मृत्यु भएकाे अन्तरराष्ट्रिय संचार माध्यमहरूले बताएका छन् ।
