काठमाडौं । नेपाली कांग्रेसभित्र देखिएको विवाद समाधानका लागि बसेको त्रिपक्षीय वार्ता सभापति शेरबहादुर देउवा को राजीनामाको विषयमा सहमति जुट्न नसकेपछि स्थगित भएको छ।
छलफलमा सहभागी एक नेताका अनुसार विशेष महाधिवेशन पक्षधरहरूले देउवाले राजीनामा दिने वा सक्रिय राजनीति छोडेको घोषणा गर्नुपर्ने माग अघि सारेका थिए। तर उक्त मागमा सहमति नजुट्दा बैठक रोकिएको हो।
‘अन्य विषयहरूमा खासै समस्या रहेन,’ ती नेताले भने, ‘तर नेतृत्वले राजीनामा दिने वा राजनीति छोड्ने भन्ने विषयमा कुरा मिलेन। यसबारे थप संवाद आवश्यक भएकाले करिब एक घण्टाका लागि बैठक स्थगित गरिएको हो।’
वार्तामा सहभागी नेताहरूले देउवाको राजीनामा वा राजनीतिक निष्क्रियताबारे निर्णय आफैंले गर्न नसकिने निष्कर्ष निकाल्दै शीर्ष नेतासँग थप छलफल गर्ने निर्णय गरेका छन्। अब उक्त विषयमा शीर्ष नेतृत्वसँग परामर्श गरी पुनः वार्ता अघि बढाइने बताइएको छ।
वार्तामा विशेष महाधिवेशन पक्ष (गगन–विश्व समूह) बाट प्रदीप पौडेल, मधु आचार्य, देवराज चालिसे र गुरुराज घिमिरे सहभागी थिए।
सभापति देउवाको पक्षबाट बालकृष्ण खाण र रमेश लेखक सहभागी भएका थिए भने शेखर कोइराला पक्षबाट सहमहामन्त्री जीवन परियार वार्तामा सहभागी थिए।
