काठमाडौँ । नेपाली कांग्रेसका केन्द्रीय सदस्य दिलेन्द्रप्रसाद बडूले आगामी निर्वाचनमा आफू उम्मेदवार नबन्ने घोषणा गरेका छन्। उनले उम्मेदवार नहुने निर्णयसहितको पत्र जिल्ला कार्य समितिमा बुझाएको र उक्त पत्र सोमबार सार्वजनिक गरिएको हो।
गत मंसिर २५ र २६ गते बसेको नेपाली कांग्रेस जिल्ला कार्य समिति दार्चुलाको बैठकले नेता बडूलाई प्रतिनिधिसभा सदस्य उम्मेदवारका रूपमा सर्वसम्मत एकल सिफारिस गरेको थियो। तर बैठकमै नेता बडूले विकसित राजनीतिक परिस्थितिलाई ध्यानमा राख्दै आफू चुनाव नलड्ने इच्छा व्यक्त गरेका थिए।
उनले विशेष गरी भदौ २३ र २४ गते भएको जेनजी आन्दोलन र प्रदर्शनपछि सिर्जना भएको राजनीतिक तथा सामाजिक अवस्थाका कारण आफू उम्मेदवार नबन्ने निर्णय लिएको बताएका छन्। साथै, आफूलाई उम्मेदवारका रूपमा सिफारिस गरेकामा जिल्ला समितिप्रति धन्यवाद पनि व्यक्त गरेका छन्।
पूर्वमन्त्रीसमेत रहेका नेता बडूले मंसिर २५ र २६ गतेको जिल्ला कार्य समिति बैठकमा नयाँ पुस्तालाई अवसर दिनुपर्ने भन्दै आफू चुनावी प्रतिस्पर्धामा नउत्रिने स्पष्ट पारेका थिए।
