काठमाडौँ । नेपाली राष्ट्रिय महिला फुटबल टोलीकी प्रमुख फरवार्ड सावित्रा भण्डारी ‘साम्बा’ दायाँ घुँडामा गम्भीर चोट लागेपछि लामो समयसम्म फुटबल मैदान बाहिर रहने भएकी छन्।
उनको क्लब वेलिङ्टन फिनिक्स फुटबल क्लबले सार्वजनिक गरेको जानकारीअनुसार सावित्राको दायाँ घुँडामा चोट लागेको हो। चिकित्सकको सल्लाहअनुसार उनी ९ देखि १२ महिनासम्म खेल गतिविधिबाट बाहिर रहनेछिन्।
यस चोटका कारण साम्बाले क्लबका आगामी खेलहरू मात्र होइन, नेपाली राष्ट्रिय टोलीका केही महत्वपूर्ण प्रतियोगिताहरू पनि गुमाउने सम्भावना छ। उनको अनुपस्थितिले क्लब र राष्ट्रिय टोली दुवैलाई ठूलो धक्का पुगेको छ।
सावित्रा भण्डारी नेपाली महिला फुटबलको एक प्रमुख खेलाडी हुन्। वेलिङ्टन फिनिक्स फुटबल क्लबले हाल उनको उपचार तथा पुनःस्थापना प्रक्रिया सुरु भइसकेको जनाएको छ।
