काठमाडौँ। माया ग्रुपले नेपाली क्रिकेटलाई सहयोग पुर्याउने उद्देश्यले नेपाली राष्ट्रिय पुरुष टोलीका उपकप्तान दीपेन्द्रसिंह ऐरीसहित कुल ९ क्रिकेटरलाई ब्राण्ड एम्बासडरमा नियुक्त गरेको छ ।
काठमाडौंमा आईतवार एक कार्यक्रम आयोजना गर्दै माया ग्रुपले उपकप्तान दीपेन्द्रसहित राष्ट्रिय टोलीकै अन्य सदस्य भीम सार्की, गुलशन झा र नन्दन यादवसँग प्रायोजन सम्झौता गरेको हो।
युवा क्रिकेटर अर्जुन साउद, रिजन ढकाल, प्रसिद्ध जैसी, सुशील रावल र नेपाली यु–१९ महिला क्रिकेट टोलीकी उपकप्तान सोनी पाख्रिनसँग पनि माया ग्रुपले सम्झौता गरेको छ । उक्त कार्यक्रममा सुशील भने उपस्थित थिएनन् । नेपाली क्रिकेट विकासमा दीर्घकालीन योजनासहित सहयोग गर्दै आएको माया ग्रुपका विश्वास छ ।
यो संस्थाले ‘माया’ नामअन्तर्गत विभिन्न क्षेत्रमा आफ्नो उपस्थिति विस्तार गर्दै आएको छ । यस ग्रुपमा माया क्रिकेट क्लब, माया इन्भेस्टमेन्ट प्रोपर्टी, माया सपोर्टेड लिभिङ, माया स्पोर्ट्स सेन्टर, राष्ट्रिय पोसाक घर (बेलायत) र माया हेटौंडा रोयल्सलगायत संघसंस्थाहरू छन् ।
यस संस्थाले यी प्लेटफर्ममार्फत खेलाडी, एकेडेमी र खेलकुद पूर्वाधारमा निरन्तर सहयोग गर्दै आएको छ । साथै बेलायतमा रहेका नेपाली समुदायलाई एकआपसमा जोड्ने कार्य पनि गरिरहेको माया ग्रुपले जनाएको छ ।
सम्झौतापछि कार्यक्रममा माया ग्रुपका राज पाण्डेले यस सहकार्यले क्रिकेट खेलाडीहरूको प्रतिभा अझ परिस्कृत गर्न केही सहयोग पुग्ने विश्वास व्यक्त गरेका छन् ।
क्रिकेटरहरूले माया ग्रुपप्रति धन्यवाद व्यक्त गर्दै आगामी दिनमा अन्य खेलाडीहरूलाई समेत यसले सहयोग पु¥याउने अपेक्षा राखेका छन् । खेलाडीहरूको प्रायोजन रकमबारे भने उल्लेख गरिएको छैन । –न्युज एजेन्सी नेपाल
