काठमाडौँ । नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहालले सिंगै मुलुक निर्वाचनको तयारीमा जुटेको बताउनुभएको छ ।
नेपाल उद्योग वाणिज्य महासंघले बुधबार काठमाडौंमा आयोजना गरेको शान्ति, स्थायित्व र समृद्धिका लागि सहकार्य सामूहिक पहल विषयक कार्यक्रममा बोल्दै उहाँले सो कुरा बताउनु भएको हो ।
संयोजक दाहालले अब मुलुकमा के होला भन्ने अन्यौलता हटेको र सबै राजनीतिक दल र आम जनतालाई निर्वाचनतिर लैजाने वातावरण बनाएको भन्दै सरकारप्रति आभार समेत व्यक्त गर्नुभयो । सरकारले धेरै खालका जटिलताहरु, चुनौतिहरु, समस्याहरु, अपठयाराहरु झेल्दै निर्वाचनको वातावरण बनाएको संयोजक दाहालको निष्कर्ष थियो ।
उहाँले भन्नुभयो,‘सरकार, राजनीतिक दल, नागरिक समाज र निजी क्षेत्रका सबै प्रतिनिधिहरु, मिडियाकर्मी पनि सबै बसेर एउटा सर्वपक्षीय सहमतीद्वारा अगाडि बढने संकल्प गर्ने वातावरण बनाउने भएको मैले महशुस गरेको छु । अव अहिले त देश अन्यौलमा छैन भन्ने हामी सबैलाई लागेको छ । म सम्मानीय प्रधानमन्त्रीज्यू र सरकारलाई विशेष धन्यवाद भन्न चाहन्छु तपाईहरुलाई निकै अप्ठयारो भएको महशुस हामीले गथ्र्यौं । गरेका छौँ । धेरै खालका जटिलताहरु, चुनौतिहरु, समस्याहरु, अपठयाराहरु झेल्दै निर्वाचन नै हो देशलाई निकास दिने अर्को होइन भनेर जो दृढता तपाईहरुले पर्दशन गर्नुभयो । अव सबै राजनीतिक दल र आम जनता पनि निर्वाचनको मानसिकतामा अघि बढने वातावरण बनाउनु भयो । त्यसका लागि विशेष रुपले सरकार र त्यसको नेतृत्व धन्यवादको पात्र भएको महशुस मैले गर्दछु । अब के होला भन्ने अन्यौल भन्दा अव निर्वाचनको तयारीतिर देश गएको छ । अहिले शान्ति, स्थायित्व र समृद्धिका धेरै भाषणा गर्नुभन्दा यो बारे हामीले धेरै कुरा गरिसकेका छौ विगतमा । मैले त यस विषयमा पटक पटक कमिटमेन्ट गरेको छु । निजी क्षेत्रलाई संरक्षण गरिएन, प्रोत्साहित गरिएन, लगानीमैत्री वातावरण बनाइएन भने विकास र समृद्धिको कुरा मात्रै हुन्छ ।’
त्यस अवसरमा संयोजक दाहालले निजी क्षेत्रको संरक्षण विना मुलुकलाई समृद्ध बनाउन सकिने अवस्था नरहेको पनि स्पष्ट पार्नुभयो ।
