काठमाडौं । फागुन २१ गते तय भएको प्रतिनिधिसभा निर्वाचनलाई लक्षित गर्दै निर्वाचन आयोगले राजनीतिक दल र उम्मेदवारलाई सञ्चारमाध्यममार्फत् चुनावी प्रचार–प्रसार गर्न सक्ने व्यवस्था गरेको छ।
आयोगले जारी गरेको ‘निर्वाचन आचारसंहिता, २०८२’ अनुसार राजनीतिक दलले टेलिभिजन, रेडियो वा एफएम रेडियोमार्फत् २४ घण्टामा कम्तीमा एक घण्टाको अन्तरालमा बढीमा चार पटकसम्म विज्ञापन प्रसारण गर्न पाउने छन्। एक पटकको विज्ञापन अवधि बढीमा एक मिनेटसम्म सीमित गरिएको छ।
पत्रपत्रिकामार्फत् प्रचार–प्रसार गर्दा भने प्रत्येक दिन कुनै एक पत्रिकामा बढीमा चार कोलम × २५ सेन्टिमिटर उचाइसम्मको सामग्री प्रकाशन गर्न पाइने व्यवस्था गरिएको छ।
पहिलो हुने निर्वाचित हुने निर्वाचन प्रणालीअन्तर्गत प्रतिनिधिसभा सदस्य पदका उम्मेदवारले पनि टेलिभिजन, रेडियो वा एफएममार्फत् २४ घण्टामा बढीमा चार पटक र एक पटकमा बढीमा एक मिनेटसम्म प्रचार सामग्री प्रसारण गराउन सक्ने छन्। पत्रपत्रिकामार्फत् प्रचार गर्दा पनि उनीहरूका लागि यही मापदण्ड लागू हुनेछ।
यस्तै, राजनीतिक दल वा उम्मेदवारले अनलाइन सञ्चारमाध्यममार्फत् निर्वाचन प्रचार–प्रसार गर्दा लागेको खर्चको विवरण अनिवार्य रूपमा निर्वाचन खर्च विवरणमा समावेश गरी प्रचलित कानुनबमोजिम पेस गर्नुपर्नेछ।
आयोगले सूचना तथा प्रसारण विभागमा दर्ता भई प्रेस काउन्सिल नेपालमा सूचीकृत अनलाइन सञ्चारमाध्यमबाट मात्र चुनावी प्रचार–प्रसार गर्न पाउने व्यवस्था गरेको छ। अनलाइन माध्यममा एक मिनेटसम्मको श्रव्यदृश्य सामग्री, रोडब्लक, कन्टेन्ट ब्लक, होमपेज ब्यानर, डिटेल पेज ब्यानर तथा समाचारबीचका बक्स विज्ञापनमार्फत् प्रचार गर्न सकिनेछ।
तर, अनलाइनमा प्रकाशित वा प्रसारित सबै प्रचार सामग्रीमा सःशुल्क विज्ञापन भएको स्पष्ट जनाउ दिनुपर्नेछ। साथै, त्यस्ता सामग्रीमा गालीगलौज, मिथ्या सूचना, दुष्प्रचार वा द्वेषपूर्ण अभिव्यक्ति समावेश गर्न नपाइने आयोगले स्पष्ट पारेको छ।
आयोगले विदेशी सञ्चारमाध्यमबाट निर्वाचनसम्बन्धी प्रचार सामग्री प्रकाशन वा प्रसारण गर्न तथा गराउन पूर्ण रूपमा निषेध गरेको छ।
