काठमाडौँ — निजी क्षेत्रका दुई ठूला वाणिज्य बैंकहरुबीच मर्जर हुने भएको छ, र त्यसका लागि दुबै बैंकले समिति गठन गरेका छन् । प्राप्त जानकारी अनुसार, नबिल बैंक र नेपाल बंगलादेश बैंक बीच मर्ज हुन लागेको हो, तर अन्तिम निष्कर्षमा पुग्न भने बाँकी छ ।
नबिल बैंकले नेपाल बंगलादेशलाई प्राप्ति (एक्विजिसन) गर्नका लागि औपचारिक रुपमा प्रक्रिया अघि बबढाएको छ ।
स्रोतका अनुसार नबिल बैंकले बुधबार र बंगलादेश बैंकले बिहीबार मर्जर समिति गठन गरेका छन् । नबिल बैंकले सञ्चालक उदयकृष्ण उपाध्यायको संयोजकत्वमा यसअघि गठन भएको मर्जर समितिलाई नै उक्त जिम्मेवारी दिएको छ ।
यी बैंकबीच धेरै पहिलेदेखि नै प्राप्तिको हल्ला चलेको थियो । यद्यपि सेयर मिलान अनुपात (स्वाप) लगायत विषयमा कुरा मिलिसकेको थिएन । केही दिनअघि यही हल्लाबीच दुबै बैंकको शेयर मूल्य वृद्धि भएको थियो ।
स्रोतका अनुसार नेपाल बंगलादेश बैंकको प्रमुख सेयरधनी बंगलादेशको आईएफआईसी बैंकले उक्त सेयर बिक्री गरेर बाहिरिन लागेको छ ।
आईएफआईसीले बिक्री गर्ने र बाँकी केही सेयर पनि खरिद गरेर नबिल बैंकले बंगलादेशलाई प्राप्ति गर्न लागेको स्रोतले बताएको छ ।
यसअघि नबिल बैंकले चौधरी ग्रुपको लगानी रहेको युनाइटेड फाइनान्सलाई प्राप्ति गरेको थियो । युनाइटेडलाई नबिल बैंकले ३५ रुपैयाँ स्वाप रेसियोमा प्राप्ति गरेको हो ।
हाल नेपाल बंगलादेश बैंकको मूल्य प्रतिकित्ता ४०२ रुपैयाँ तथा नबिलको १४५० रुपैयाँ छ । नबिलले गत आर्थिक वर्षको नाफाबाट ३३.६ प्रतिशत सेयर बोनस र ४.४ प्रतिशत नगद लाभांश दिने घोषणा गरेको छ ।
नेपाल बंगलादेश बैंकले भने १२ प्रतिशत सेयर बोनस र ३.५ प्रतिशत नगद लाभांश वितरण गरिसकेको छ ।
