काठमाडाैँ: आज बालुवाटारमा ‘आइस ब्रेक’ भएको छ । गत भदौको जेनजी आन्दोलनपछि पहिलो पटक आज प्रधानमन्त्री सुशीला कार्कीले तत्कालीन सत्ता साझेदार दल नेपाली कांग्रेस र नेकपा एमाले तथा प्रमुख प्रतिपक्षी दल तत्कालीन माओवादी केन्द्र र अहिले नेपाली कम्युनिष्ट पार्टीमा परिणत भैसकेको दलका अध्यक्षहरुसँग प्रधानमन्त्री कार्कीले भेट र छलफल गरेकी हुन् ।
प्रधानमन्त्रीले प्रमुख तीन राजनीतिक दलका नेताहरुलाई गरेको भेटलाई ‘आइस ब्रेक’ नै भन्नुपर्ने त होइन, तर प्रधानमन्त्री स्वयंले पुराना पार्टीका नेताहरुको मुहार हेर्न पनि मन छ्रैन भन्दै आएकोमा आज उनले आफैँले नेताहरुलाई बोलाएर गरेको छलफललाई सबैले ‘आइस ब्रेक’ नै भनेका छन् ।
जेनजी आन्दोलनपछि सरकारमा आएकी प्रधानमन्त्री कार्कीले उनीहरुलाई भेट्न रुचाएकी पनि थिइनन् । सायद राष्ट्रपति रामचन्द्र पौडेलले नै दबाब दिएर होला केही दिनमात्र अघि राष्ट्रपति पौडेलले तीन पूर्वप्रधानमन्त्री र प्रधानमन्त्रीको बैठक आह्वान गरेका थिए । त्यो पनि एउटा ‘आइस ब्रेक’ नै थियो ।
तर पनि मुलुकको कार्यकारी प्रमुखले नै परम्परागत शक्तिलाई यसरी बाइपास गरेपछि कसरी निर्वाचन होला त भन्ने व्यापक आशंका र क्रिया प्रतिक्रियाहरुपछि आज बालुवाटारमा यो संयोग जुरेको हुनसक्छ ।
यदि निर्वाचन नै गर्ने हो भने त जेनजीले विरोध गरुन् या जे गरुन् पुराना तीन दल नेपाली कांग्रेस, नेकपा एमाले र नेपाली कम्युनिष्ट पार्टीको सहमति र सहयोग बिना चुनाव असम्भव नै छ । यो तथ्य आवश्यकतालाई जेनजी सरकारकी प्रधानमन्त्री कार्कीले नै स्वयं मनन् गरेको हुनुपर्दछ । यसैकारण तीन दलका नेतालाई बैठकमा बोलाएको हुनुपर्दछ ।
आजको बैठकमा निवर्तमान प्रधानमन्त्री एवं एमाले अध्यक्ष केपी शर्मा ओली, कांग्रेस सभापति शेरबहादुर देउवा र नेपाली कम्युनिष्ट पार्टीका नेता पुष्पकमल दाहाल प्रचण्ड सहभागी थिए । बालुवाटारमा आज लामै भेटवार्ता चलेको थियो ।
छलफलपछि जानकारी दिँदै सरकारका प्रवक्ता जगदिश खरेलले बैठक सौहार्द सम्पन्न भएको र चिर्वाचन सम्पन्न गर्ने काममा सहयोग गर्न प्रधानमन्त्रीले उहाँहरुलाई भन्नुभएको र उहाँहहरु पनि यसमा सहमत भएको बताए ।
चुनावमा जान तयार भएको कुरा त कांग्रेस सभापति शेरबहादुर देउवाले पनि बाहिर निस्केर पत्रकारहरुलाई बताएका थिए । उनले चुनावमा जान सबै तयार रहेको, कांग्रेस एमाले सबै तयार रहेको तर वातावरण बन्न नसकेको बताएका थिए ।
सभापति देउवाले भनेजस्तै पछिल्लो समय एमाले पनि चुनावका लागि अलिक लचिलो भएको देखिएको छ । एमाले अध्यक्ष ओलीले पनि पछिल्लो समय दिएका अभिव्यक्तिमा एमाले चुनावबाट नभाग्ने बताएका छन् । प्रचण्ड त पहिलेदेखि नै चुनावका लागि तयार नै थिए ।
यो माहौल, नेताको प्रतिक्रिया र आज भएको ‘आइस ब्रेक’ ले देश अब विस्तारै चुनावतिर धकेलिएको देखिएको छ । केही दिन अघि सम्म संसदको पुनस्र्थापनाका विषयमा भएको बहस आजदेखि अब चुनावतर्फ केन्द्रित हुन पुगेको जस्तो देखिएको छ ।
तर यता दुई दिनदेखि निरन्तर संवादमा रहेका नयाँ शक्तिका नेताहरुको म्याराथन बैठकले पनि देशको राजनीतिलाई थप रोचक बनाएको छ । काठमाडौंका मेयर बालेन शाह र रास्वपा सभापति रवि लामिछानेबीचको वार्ताबाट सुरु भएको चर्चाले अर्का शक्ति भनिएका कुलमान घिसिङ मिसिँदा चर्चा झनै बढाएको छ ।
उनीहरुबीच बिहीबार र शुक्रबार निरन्तर वार्ता भयो । उनीहरूले ऊर्जामन्त्री समेत रहेका कुलमान घिसिङलाई समेत समेटेर अघि बढ्नेबारे पनि पटक पटक छलफल गरे ।
आज पनि वार्तालाई निष्कर्षमा पु¥याउने भनिएकोमा अहिले साँझसम्म कुनै प्रगतिको समाचार बाहिरिएको छैन । बालेन–रवि छलफल शनिबार भने टेलिफोनमा मात्रै सीमित बनेको समाचार स्रोत बताउँछ ।
समाचार स्रोतले भन्यो ‘हिजो त तीन जनाकै बीचमा कुराकानी भएको हो । तर आज केही घण्टालाई वार्ता अवरुद्ध जस्तै बन्न पुग्यो । आज भेट कसैको भएन । बालेन, रवि र कुलमानका बीचमा आज भने टेलिफोन वार्ता मात्रै भयो ।’
यी तीन शक्तिका बीचमा शक्ति बाँडफाँडमा कुरा नमिलेको सो स्रोत बताउँछ । स्रोतका अनुसार रविसँग कुलमान र बालेनले आफ्ना लागि प्रतिनिधिसभाका लागि ५०÷५० सिट मागेका छन् । तर रविले रास्वपामा यसअघि नै पर्याप्त आकांक्षी रहेकाले ७०–३० को अनुपातमा समानुपातिक उम्मेदवार सूची तयार पार्नुपर्ने बताए ।
त्यसमा छलफल गरेर संख्या तलमाथि गर्न सकिने बताइए पनि यी दुई पार्टीलाई १०० सिट दिन रवि तयार छैनन् । यसकारण पनि वार्ता मिल्ने सम्भावना छैन, स्रोतले भन्यो ।
स्रोतले भन्यो ‘अहिले बाहिर आएका समाचारहरु मिडिया ट्रायल पनि हो । आफाआफैँ समाचार दिइरहेका छन् तिनै पक्षका मान्छेहरुले । तर वास्ताविकता के हो भने एकले अर्कालाई विश्वास गर्न सकेको अवस्था देखिँदैन । एकले अर्कालाई प्रयोग, उपयोग गर्न खोजेको शंका गरिरहेका छन् । यसकारण शक्तिको बाँडफाँडमा उनीहरुका बीचमा कुरा मिल्ने जस्तो देखिँदैन ।’
