काठमाडौँ । जेनजी घटनाको छानबिन गर्न सरकारले गठन गरेको जाँचबुझ आयोगका अध्यक्ष पूर्वन्यायाधीश गौरीबहादुर कार्कीलाई पदमुक्त गर्न माग गर्दै दायर गरिएको रिट सर्वोच्च अदालतले खारेज गरेको छ।
सर्वोच्च अदालतका न्यायाधीश मनोजकुमार शर्मा, नहकुल सुवेदी र श्रीकान्त पौडेलको इजलासले आयोग गठन र अध्यक्ष नियुक्ति कानुनसम्मत रहेको ठहर गर्दै रिट खारेज गर्ने आदेश दिएको हो।
आयोगको निष्पक्षता र औचित्यमा प्रश्न उठाउँदै अधिवक्ता विपिन ढकालले कात्तिक १८ गते आयोगका अध्यक्ष गौरीबहादुर कार्की, सदस्यहरू विज्ञानराज शर्मा र विश्वेश्वरप्रसाद भण्डारीविरुद्ध रिट पेस गरेका थिए।
अदालतले रिट निवेदनमा उठाइएका आधारहरू आयोगको कामकारबाही रोक्ने वा अध्यक्षलाई पदमुक्त गर्ने पर्याप्त कारण नभएको निष्कर्ष निकालेको छ।
यससँगै जाँचबुझ आयोगले जेनजी घटनासम्बन्धी छानबिन कार्यलाई निरन्तरता दिने बाटो खुलेको छ। आयोगमा पूर्वएआईजी विज्ञानराज शर्मा र संयुक्त राष्ट्रसंघीय नियोगहरूमा काम गरेका अधिवक्ता विशेश्वरप्रसाद भण्डारी सदस्य छन्।
सरकारले जेनजी घटनामा देखिएका विवाद र सम्भावित कमजोरीबारे सत्यतथ्य पत्ता लगाउन भन्दै आयोग गठन गरेको थियो।
