काठमाडौं । प्रधानमन्त्री सुशीला कार्कीले आज प्रतिनिधि सभा सदस्य निर्वाचनसम्बन्धी कानुन र व्यवस्थापनका विषयमा राजनीतिक दलहरू तथा नागरिक प्रतिनिधिहरूसँग छलफल गर्नुहुने भएको छ ।
प्रधानमन्त्रीको सचिवालयका अनुसार छलफल दिउँसो १ बजे सिंहदरबारमा सुरु हुनेछ। छलफलमा गृह मन्त्रालय र निर्वाचन आयोगले आ–आफ्नो प्रस्तुतीकरण गर्ने कार्यक्रम छ।
छलफलमा राजनीतिक दलका दोस्रो तहका नेताहरू सहभागी हुने छन्। एमालेबाट शंकर पोखरेल र महेश बर्तौला, कांग्रेसबाट सहमहामन्त्री महेन्द्र यादव, नेपाली कम्युनिस्ट पार्टीबाट वर्षमान पुन र राजेन्द्र पाण्डे सहभागी हुनेछन्। यस्तै, रास्वपाबाट शिशिर खनाल र सोविता गौतम सहभागी हुने तय भएको छ।
फागुन २१ गते हुने प्रतिनिधि सभा सदस्य निर्वाचनलाई केन्द्रमा राखेर प्रधानमन्त्री कार्कीले पछिल्लो समय विभिन्न राजनीतिक दलका नेताहरूसँग निरन्तर छलफल गरिरहनुभएको छ। यद्यपि अहिलेसम्म शीर्ष तहका नेताहरूसँग औपचारिक भेटघाट भने भएको छैन।
