एजेन्सी । सुपरहिट फिल्म बाहुबलीपछि, प्यान इन्डिया स्टार बनेका प्रभासको फिल्म राधे श्यामले बक्स अफिसमा आफ्नो चमत्कार देखाउन सकेको छैन । ‘
पुष्पा–द राइज’ रिलिज भएपछि अल्लु अर्जुनले जस्तै प्रभासले पनि तेलुगु बक्स अफिससँगै हिन्दी बक्स अफिसमा पनि जादू चलाउनेछन् भन्ने सबैको अपेक्षा थियो । तर, यो सम्भव देखिँदैन ।
बक्स अफिसमा राधे श्यामको कूल ओपनिङसँगै प्रभासको प्यान इन्डिया स्टार बन्ने प्रयासलाई ध्वस्त पारिएको छ । ३५० करोडको बजेटमा बनेको यो फिल्म दुई दिनमै फिक्का साबित भएको छ ।
फिल्मको हिन्दी संस्करणले पहिलो दिन चार करोड ५० लाख कमाएको छ । पहिलो दिनको तुलनामा दोस्रो दिन पनि फिल्मको कलेक्शन उस्तै रह्यो ।
फिल्म रिलिज हुनुअघि नै सिनेमाघरमा राधे श्यामको लागि जसरी अग्रिम बुकिङ भइरहेको थियो, त्यसले चलचित्रको अपेक्षा निकै बढेको थियो । तर, रिलिजपछि प्रभासका फ्यानहरु निराश भएका छन् ।
भारतमा राधे श्यामको कलेक्शनको कुरा गर्ने हो भने फिल्मले दोस्रो दिन २४ देखि २७ करोड रुपैयाँ कमाएको छ । दोस्रो दिन विश्वव्यापी कलेक्शनमा पहिलो दिनको तुलनामा ६० प्रतिशत कम थियो । आफ्नो बजेट पूरा गर्न मुस्किलले सक्षम हुने देखिन्छ । राधे श्यामलाई राधाकृष्ण कुमारले निर्देशन गरेका हुन् । फिल्ममा पूजा हेगडे पहिलो पटक प्रभासको अपोजिटमा देखिइन् । तर अफसोस, उनको जादूले काम गरेन ।
