मोरङ। विराटनगर महानगरपालिका-९स्थित शिक्षादीप कलेजका कक्षा ११ र १२ मा अध्ययनरत विद्यार्थीले सूचना प्रविधिमा आधारित जीवनउपयोगी रोबर्टहरू निर्माण गरी प्रदर्शन गरेका छन् ।
कलेजद्वारा आयोजित १३ दिने नवप्रवर्तन कार्यशालाको आज अन्तिम दिन विद्यार्थीले विभिन्न एप र बजार व्यवस्थापनसम्बन्धी प्रविधिका आठ वटा ढाँचा गरी प्रस्तुत गरेका हुन् ।
प्राचार्य ज्ञानबहादुर खड्काले टेक्सपायर कलेज, कोड हिमालय र पिसिपीएस कलेज काठमाडौँसँगको सहकार्यमा सूचना प्रविधि (आइटी)को क्षेत्रमा काम गरिरहेको बताउँदै विद्यार्थीको मेहनतले जीवनउपयोगी रोबर्टहरू निर्माण गरी प्रदर्शन गरिएको जानकारी दिनुभयो ।
कलेजका सञ्चालक रामचन्द्र अधिकारीले कार्यशालामा विद्यार्थीले आगन्तुकलाई मिठोे बोलेर, शिर झुकाएर, श्रद्धापूर्वक स्वागत गर्ने रोबर्ट तयार गरी प्रर्दशनी गर्नुका साथै सवारीसाधन सञ्चालनका क्रममा अवरोध आए छलिने, तर्किने र केही समय रोकिएर अघि बढ्न जानकारी दिने रोबर्ट प्रदर्शन गरिएको बताउनुभयो । उहाँका अनुसार कार्यशालामा ‘एन्टी बङ्किङ एप’, ‘एआई भ्वाइस’ सहायक, अनुहार पहिचान उपस्थिति ट्रयाकर तयार गरिएको हो ।
वाणिज्य शास्त्र सङ्कायका विद्यार्थीले बजार व्यवस्थापनसम्बन्धी प्रविधिका आठ वटा ढाँचा तयार गरी प्रस्तुत गरेका छन् । यसअन्तर्गत पानी व्यवस्थापन, तरकारी व्यवस्थापन, ट्युटर एप, अनलाइन यातायात बुकिङ, एग्रो कनेक्टलगायत रहेका सञ्चालक अधिकारीले जानकारी दिनुभयो ।
विद्यार्थीहरूलाई कोड हिमालयका आशिष प्रसाईं, पिसिपीएस कलेजकी कृपा श्रेष्ठलगायतले प्रशिक्षण दिनुभएको थियो । कार्यशालामा कम्प्युटर र विज्ञान सङ्कायका ६२० र व्यवस्थापन सङ्कायका १३४ विद्यार्थी सहभागी थिए । रासस
