काठमाडौं। दोस्रो संस्करणको नेपाल प्रीमियर लिग (एनपील) को उपाधि लुम्बिनी लायन्सले जितेको छ ।
भर्खरै सम्पन्न खेलमा सुदूरपश्चिम रोयल्सलाई ६ विकेटले हराउँदै लुम्बिनी पहिलोपटक च्याम्पियन बनेको हो । गत सिजनको उपविजेता सुदूरपश्चिम यो पटक पनि उपविजेता मै सिमित रह्यो ।
८६ रनको सामान्य लक्ष्य लुम्बिनीले ९ ओभरमा ४ विकेट गुमाएर भेट्टायो ।
लुम्बिनीलाई उपाधि दिलाउन दिनेश अधिकारीले ४२ रनको विस्फोटक पारी खेले । १३ बल खेलेका उनले ५ छक्का र १ चौका प्रहार गरे । यस्तै, डार्सी शर्टले १४ रन बनाउँदा कप्तान रोहित पौडेलले १६ रन जोडे ।
वलिङतर्फ सुदूरपश्चिमका हेमन्त धामीले दुई विकेट लिए । अविनाश बोहरा र दिपेन्द्र सिंह ऐरीले एक एक विकेट हात पारे ।
त्यसअघि टस जितेर पहिले ब्याटिङ थालेको सुदूरपश्चिम १९.१ ओभरमा अलआउट भयो ।
उसका लागि इशान पाण्डेले सर्वाधिक ३३ रन बनाउँदा कप्तान दिपेन्द्र सिंह ऐरीले १३ रन जोडे । यस्तै, विनोद भण्डारी, दीपक बोहरा र पुनित मेहराले खाता समेत नखोली शून्य रनमै पभेलियन फर्किए । हरमित सिंहले १०, स्कट कुगलाइनले १०, शेल्डन ज्याकसनले १, आरिफ शेखले ६ रनमात्रै बनाए ।
वलिङतर्फ लुम्बिनीका रोहित पौडेलले ह्याट्रिकसहित तीन शेर मल्लले र रुवेन ट्रम्पलमानले तीन तीन विकेट लिँदा तिलक भण्डारीले एक विकेट लिए ।
विजेता लुम्बिनीले १ करोड १० लाख रुपैयाँ पुरस्कार प्राप्त गर्यो । उपविजेता सुदूरपश्चिमले ५१ लाखमै चित्त बुझायो ।
मंसिर १ गतेदेखि सुरु भएको प्रतियोगितामा ८ टोलिले सहभागिता जनाएका थिए । अघिल्लो संस्करणको उपाधि जनकपुर बोल्ट्सले जितेको थियो ।
