काठमाडौं । नेपाली कांग्रेसका सहमहामन्त्री बद्री पाण्डे आगामी प्रतिनिधि सभा चुनावमा प्रतिस्पर्धा नगर्ने भएका छन्।
२०७९ सालमा बाजुरा क्षेत्रबाट प्रत्यक्षतर्फ निर्वाचित पाण्डेले यसपटक चुनावमा नउत्रने निर्णयसँगै उनको नाम सिफारिससूचीमा समेत समावेश गरिएको छैन।
पूर्व संस्कृति, पर्यटन तथा नागरिक उड्डयनमन्त्री पाण्डेले नयाँ पुस्तालाई अवसर दिन आफू चुनावी प्रतिस्पर्धाबाट बाहिरिने निर्णयमा पुगेको बताए।
‘सांसद र मन्त्री भइसकेँ। अब नयाँ पुस्तालाई अवसर दिनुपर्छ भन्ने सोचेर चुनाव नलड्ने निर्णय गरेको हुँ,’ पाण्डेले भने। उनका अनुसार अब पार्टी सुदृढीकरण र संगठन विस्तार नै आफ्नो प्राथमिकता हुनेछ।
प्रत्यक्ष, समानुपातिक र राष्ट्रिय सभा— कुनै पनि तहमा उम्मेदवारी लिन चाहना नरहेको पाण्डेले स्पष्ट पारेका छन्।
जेनजी आन्दोलनका क्रममा पाण्डे तत्कालीन एमाले अध्यक्ष केपी शर्मा ओली नेतृत्वको सरकारमा मन्त्री थिए। सरकारको भाग भए पनि आन्दोलनरत युवाका मागहरू समयमै सम्बोधन गर्न नसकिएको अनुभूति उनले व्यक्त गरे।
प्रत्यक्ष भूमिका नरहे पनि मन्त्रिपरिषद्का सदस्यका रूपमा त्यसको नैतिक जिम्मेवारी आफूले लिने बताउँदै उनले यसपटक चुनावको प्रतिस्पर्धाबाट बाहिरिनु उचित ठानेको बताए।
पाण्डेले भने, ‘अब पार्टीलाई वैचारिक रूपमा सुदृढ बनाउने र संगठनलाई सक्रिय बनाउने काममा ध्यान केन्द्रित गर्छु।’
