विद्यालय भवन निर्माण गर्न सहयोग
काठमाडौं । नेपाली लोकपप ‘नेपथ्य ब्यान्ड’का सदस्यहरू बुधबार कन्सर्टको अभ्यासमा व्यस्त देखिन्थे । उनीहरूले स्कुल पुनर्निर्माणका लागि आर्थिक संकलन गर्न काठमाडौंको भृकुटीमण्डपमा यही शनिबार लाइभ कन्सर्ट गर्दै छन् । सोही अभियानका लागि उनीहरू कन्सर्टको अभ्यासमा व्यस्त भएका हुन् । दोलखा भीमेश्वर नगरपालिका–२ को राजकुलेश्वर प्राथमिक विद्यालयको भवन २०७२ को भूकम्पले लडेको थियो । त्यसपछि त्यहाँका विद्यार्थीहरू अस्थायी भवन र चौरमा पढ्न बाध्य छन् । सो भवन निर्माणका लागि हेल्प नेपालले रकम जुटाउँदै आएको थियो ।
तैपनि रकम नपुगेपछि यसपटक सो विद्यालय भवन निर्माणको हेल्प नेपालको सहकार्यमा नेपथ्यले १६ फागुनमा कन्सर्ट गर्न लागेको हो । ‘उत्कृष्ट शिक्षाका लागि उत्कृष्ट पूर्वाधार’ नारासहित यो कन्सर्ट गर्न लागेको नेपथ्य समूहका गायक अमृत गुरुङले बताए । ‘राजकुलेश्वर आधारभूत सरकारी पाठशालाईका विद्यार्थीहरू अहिले पनि टहरामै बसेर अध्यन गर्न बाध्य छन् । भूकम्पको बेला हामी सबै नेपालीहरू स्वतःस्फूर्त रूपमा सहयोगका लागि जसरी एकजुट भएका थियौं । त्यस्तै, सहयोग आज पनि खाँचो रहेकोले कन्सर्ट गर्न लागेका हौं,’ गायक अमृतले भने ।
त्यस्तै, हेल्प नेपाल नेटवर्कका अध्यक्ष अरुणसिंह बस्नेतले यो कन्सर्टको पैसा स्कुल निर्माणमा जाने भएकाले कन्सर्टमा टिकट लिएर सहभागी हुन संगीतप्रेमीहरूलाई आह्वान गरेका छन् । कार्यक्रममा नेपथ्य समूहले आफ्ना चर्चित डेढ दर्जनभन्दा बढी गीतहरू प्रस्तुत गर्नेछन् । राजधानी दैनिक
