अहिले म
एक यन्त्रको गोठालो भएको छु
पहिले सेउती खोलामा गोठालो जाँदा
मसँग मेरा गाई गोरुहरु, बाख्रा भैंसीहरु थिए
साथी सङगीहरु थिए । दशैंमा फोटो खिच्दा
केही बाछा बाछी, पाठा पाठी अटाउँथे
दिन भरि
म मेरा गाई भैंसीकाे मुख हेर्थे
बाछा बाछीले मेरो मुख हेर्दथे ।
अहिले,
मेरो गोजीमा मालीनाम गरेको
एक थान यन्त्र छ
यसले मलाई देख्छ वा देख्दैन
थाहा छैन मलाई
तर,
मैले त्यसलाई न हेरेको कुनै क्षण छैन ।
पुस्तक हुने सिरानीमै यन्त्र छ
कलम हुने हातैमा
पुष्प नियाल्ने आखैंमा
माया छोपेर राख्ने मनमा पनि यन्त्र छ ।
अहिले
म गोठालो भएको छु ।
मेरो भोक
मेरो निद्रा
मेरो सपना
सबै यन्त्रले नै देख्दछ, सुन्दछु, बोल्दछु, स्वाद लिन्छु ।
हो म व्यस्त छु
म व्यस्त छु आमा,
मेरो प्रतिमा हेर्नु होला ।
मैले सन्देश पठाएको छु,
बुबा,आमाकी,
म व्यस्त छु छोरा,
नयाँ तस्वीर राखेस ल ।
म व्यस्त छु छोरी
साझ बोलुँला है ।
यीभन्दा अरु साईनो त भुलिसके कि कसो ?
हो अहिले म व्यस्त छु ।
म के मा व्यस्त छु
त्यो हेर्न सक्नु हुन्छ
म भन्न सक्दिन ।
महसुस गर्नुहोला ।
देवी प्याकुरेल, सुनसरी
हाल, दाङ
२०७६ फागुन १५ गते , रात्री १०ः ५१ शुभम् ।
