काठमाडौं । त्रिभुवन अन्तरराष्ट्रिय विमानस्थलले यात्रुको सुविधाका लागि उपलब्ध गराउदैँ आएको ‘भिजिटर पास’ वितरण बन्द गरेको छ । कोरोना भाइरसको सम्भावित जोखिमलाई ध्यानमा राखी विमानस्थलले ‘भिजिटर पास’ वितरण बन्द गरेको हो ।
अर्को व्यवस्था नभएसम्मका लागि पास वितरण बन्द गरिएको अन्तर्राष्ट्रिय विमानस्थल नागरिक उड्डयन कार्यालयले विज्ञप्ति जार्री गरी जानकारी दिएको हो । विमानस्थलबाट आवतजावत गर्ने सबै हवाई यात्रुलाई स्वागत तथा बिदाइ गर्न आउने आफन्तजन लगायतलाई अत्यावश्यक अवस्थाबाहेक विमानस्थल क्षेत्रमा प्रवेश नगरिदिन आग्रह गरेको छ ।
विमानस्थलमा अत्यावश्यक काममा आउने सबैलाई मास्क प्रयोग गरिदिन पनि विज्ञप्तिमाफर्लत अनुरोध गरिएको छ । चीनको वुहान शहरमा देखा परेको कोरोना भाइरसको संक्रमणबाट बच्न सचेतना अपनाउनुपर्ने भएको तथा विश्व स्वास्थ्य सङ्गठनले नेपाललाई उच्च जोखिममा राखेका कारण यस्तो व्यवस्था गरिएको विमानस्थलले जनाएको छ ।
