काठमाडौँ । दोस्रो संस्करणको नेपाल प्रिमियर लिग (एनपीएल)को १९औँ खेलमा काठमाण्डु गोर्खाजले कर्णाली याक्सलाई पराजित गरेको छ ।
भर्खरै सम्पन्न खेलमा काठमाण्डुले कर्णालीलाई ५ विकेटले हराएको हो । कर्णालीले दिएको १५० रनको लक्ष्य काठमाण्डुले १८ ओभरमा ५ विकेटको क्षतिमा भेट्टायो ।
उसका लागि जेरहार्ड इरास्मसले अविजित ४३ रन जोडे भने जोन सिम्पसनले ४१ रनको योगदान दिए । यस्तै, बेन चार्ल्सवर्थले ३४, मिलिन्द कुमारले १५ रन जोडे ।
बलिङतर्फ कर्णालीका नन्दन यादवले तीन तथा पवन सराफले एक विकेट लिए ।
त्यसअघि टस जितेर पहिला ब्याटिङ गरेको कर्णालीले निर्धारित २० ओभरमा सात विकेटको क्षतिमा १४९ रन बनायो । जसमा गुल्शन झाले सर्वाधिक ४९, पवन सराफले ३५, मार्क वाटले ३० रन जोडे ।
बलिङतर्फ काठमाण्डुका राशिद खानले दुई विकेट लिए । यस्तै, करण केसी, मिलिन्द कुमार र सन्तोष यादवले एक–एक विकेट लिए ।
सोमपाल कामीको कप्तानीमा रहेको कर्णालीले पाँच खेलबाट एक खेल मात्रै जितेको छ । दुई अङ्क मात्रै जोडेको कर्णाली छैटौँ स्थानमा छ ।
करण केसी नेतृत्वमा रहेको काठमाडौँले ६ खेलबाट चार खेल जितेको छ । आजको जितसँगै काठमाण्डुले प्लेअफको यात्रामा बलियो दाबेदारी प्रस्तुत गरेको छ । जारी प्रतियोगितामा अपराजित सुदूरपश्चिम रोयल्सले पाँच जितका साथ प्लेअफमा सुरक्षित भइसकेको छ ।
नेपाल क्रिकेट सङ्घको आयोजनामा यही मङ्सिर १ गतेदेखि सुरु भएको प्रतियोगितामा आठ टोली सहभागी छन् ।
