काठमाडौँ । विवेकशील साझा पार्टीका नेता मिलन पाण्डेले राष्ट्रिय स्वतन्त्र पार्टी (रास्वपा)सँग हुने एकीकरण प्रक्रियामा सहभागी नहुने घोषणा गरेका छन्।
उनले शुक्रबार सामाजिक सञ्जालमार्फत एकीकरणमा लागेका सबैलाई शुभकामना दिँदै आफू भने त्यस प्रक्रियामा नजुट्ने स्पष्ट पारेका हुन्।
पाण्डेले लेखेका छन्, “विवेकशील साझा र रास्वपाको एकीकरणमा जुट्नुभएको सबै साथीहरूलाई शुभकामना छ। म यो एकीकरणमा सामेल छैन।”
उनका अनुसार अब केही समय राजनीतिक रूपमा ‘कुलिङ पिरियड’ लिएर नयाँ तरिकाले राजनीतिक यात्रा सुरु गर्ने तयारी छ। “अब केही समय (केही दिन वा केही महिना) कुलिङ पिरियड लिन्छु। त्यसपछि नयाँ ढंगले राजनीतिक यात्रा सुरु गर्नेछु,” उनले लेखेका छन्। उनले आजदेखि आफू ‘स्वतन्त्र’ भएको र विवेकशील पनि ‘स्वतन्त्र’ बनेको उल्लेख गरेका छन्।
यता, आजै दिउँसो २ बजे राष्ट्रिय सभागृहमा रास्वपा र विवेकशील साझा पार्टीबीच एकीकरण घोषणा गर्ने कार्यक्रम तय भएको छ।
एकता घोषणासभा सुरु हुनु अघि नै पाण्डेले आफू उक्त प्रक्रियामा नजुट्ने जानकारी सार्वजनिक गरेका हुन्।
