काठमाडौँ । नेपाली कम्युनिस्ट पार्टी (नेकपा) का संयोजक पुष्पकमल दाहालले देशको स्वाधीनता, भू–अखण्डता र जनसत्ता जोगाउन वामपन्थी शक्तिहरू ध्रुविकृत हुनुपर्ने बताउनुभएको छ ।
शुक्रवार धनगढीमा आयोजित पार्टीको एकता सन्देश सभालाई सम्बोधन गर्दै उहाँले यस्तो बताउनुभएको हो ।
उहाँले नेकपा (एमाले)का नेताहरुलाई मुलुक र नेपाली जनताको रक्षाका लागि समाजवादको यात्रामा गोलबद्ध हुन आह्वान समेत गर्नुभयो । उहाँले गत भदौ २३ र २४ गतेको जेन–जी आन्दोलनलाई आफूले शुरुदेखि नै समर्थन गर्दै आएको उल्लेख गर्दै उनीहरुका जायज मागहरु सम्बोधन गर्न वाम एकता गरेको बताउनु भयो । उहाँले केहीले निर्वाचन जित्नको लागि मात्र एकता गरेको भन्ने टिप्पणी गर्ने गरेको भन्दै त्यो कुरामा कुनै सत्यता नरहेको बताउनुभयो । उहाँले कृषि, शिक्षा, स्वास्थ्यमा क्रान्ती ल्याउनको लागि कम्युनिष्ट तथा गैरकम्युष्टि पार्टीहरुलाई मिलाएर लैजाने अभियानको थालनी गरिएको बताउनु भयो ।
उहाँले भन्नुभयो, ‘म नेकपा एमालेभित्र रहेका सबै क्रान्तीकारी नेताहरुलाई पनि गहिरो गरी विचार गर्न, चिन्तन गर्न र वृहत शक्ति निर्माण गरेर यो राष्ट्रको रक्षा गर्ने, यसको स्वाधिनताको रक्षा गर्ने, भौगोलिक अखण्डता र नेपाली जनताको सार्वभौम सत्ताको रक्षा गर्ने कुरामा गम्भीर भएर धुव्रिकृत हुनको लागि हामी विषेश रुपले अपिल गर्न चाहान्छौं । यो सभामार्फत देशभरीका अन्य वामपन्थी क्रान्तीकारीहरुलाई पनि अब बिना कुनै पूर्वाग्रह एउटा वृहत शक्ति निर्माण गरेर नयाँ समाजवाद निर्माणको संकल्पमा अगाडि आउन म अपिल गर्न चाहन्छु । म देशभरका देशभक्त जनतालाई पनि अपिल गर्न चाहान्छु । २३ गतेको जेनजी आन्दोलन र त्यसका मुद्दाहरु हामीहरुले उठाउँदै आएका माग मुद्दाहरु थिए । हामीले युवाहरुको त्यो आन्दोलन जायज छ भनेर शुरुमै समर्थन गरेका थियौं । हामीले युवाहरुको आन्दोलनमा सरकारले बल प्रयोग नगरोस् भनेर खबरदारी समेत गरेका थियौं । तर दुर्भाग्य २३ गते ठूलो नसंहार भयो ।’
उहाँले नेकपा (एमाले)का अध्यक्ष केपी शर्मा ओली उल्टो बाटो हिँडिरहेको टिप्पणी गर्नुभयो । आफूले संसद विघटन गर्दा ठिक भन्ने अहिले संसद पुनःस्थापनाको माग माग गर्दै ओली बेतुकको तर्क गर्दै हिँडेको उहाँको आरोप छ ।
