काठमाडौँ । बञ्चरेडाँडा सेनेटरी ल्याण्डफिल साइटका प्रभावित स्थानीयले फोहोर विसर्जन पुन: रोक्ने भएका छन् । सहरी विकास मन्त्री कुलमान घिसिङको प्रतिबद्धता जनाएपनि माग पूरा नगरेको भन्दै उनीहरुले बुधवारदेखि फोहोर विसर्जनमा पूर्ण रूपमा रोक लगाउने घोषणा गरेका हुन् ।
मंगलबार बञ्चरेडाँडा र सिसडोलको बीचमा पर्ने धारेमा पत्रकार सम्मेलन गर्दै स्थानीयहरुले यस पटकको आन्दोलन वार कि वार हुने बताएका छन् । मन्त्री घिसिङले केवल आश्वासन दिएको र वास्तविक समस्या समाधानमा कुनै चासो नदिएको उनीहरुको भनाई छ । गत कात्तिक १६ गते मन्त्री घिसिङ सहितको टोलीले बञ्चरेडाँडाका स्थानीय बासिन्दा र जनप्रतिनिधिहरूसँग छलफल गरेका थिए । सो छलफलमा मन्त्री घिसिङले स्थानीयका मागहरू १५ दिनभित्र पूरा गर्ने प्रतिबद्धता जनाएपछि स्थानीयहरुले फोहोर फाल्नको लागि अवरोध हटाएका थिए ।
तोकिएको समयसिमा सकिएपनि मन्त्री र महानगरपालिकाबाट कुनै ठोस काम नभएको भन्दै उनीहरुले पुनः बुधबारबाट फोहोर विसर्जनमा रोक लगाउने निर्णय गरेका हुन् ।
फोहोरमैला व्यवस्थापनको लागि दीर्घकालीन समाधानको लागि संघर्ष गर्दै आएका स्थानीयहरुले आफ्ना माग पूरा नभएको भन्दै लामो समयदेखि पटकपटक आन्दोलित हुँदै आएका छन् ।
