काठमाडौँ । नेपाली कम्युनिष्ट पार्टीका नेता वर्षमान पुनले आफूहरुको पार्टीले आगामी निर्वाचनमा सबैभन्दा धेरै सिट जित्ने दाबी गर्नुभएको छ ।
निर्वाचन आयोगमा सञ्चारकर्मीहरुसँग कुरा गर्दैै उहाँले यस्तो दाबी गर्नुभएको हो । उहाँले आफूहरु आगामी निर्वाचनमा १ सय ६५ वटै निर्वाचन क्षेत्रमा निर्वाचन लड्ने पनि बताउनु भयो । जनार्दन शर्माबारे सञ्चारकर्मीको जिज्ञासामा उहाँले छुटेको रेलमा विस्तारै घुम्तीका स्टेशनहरुमा चढ्ने टिप्पणी गर्नुभयो । आफूहरु जेन जीका माग पूरा गर्न र जनतालाई जोड्ने काममा लाग्ने पनि बताउनु भयो ।
उहाँले भन्नुभयो, ‘धेरै साथीहरु गोलवन्द हुँदै कमरेड पुष्पलालको सपनालाई वैज्ञानिक समाजवादसँग जोड्ने आजका युवाहरुको, आजका जनताहरुसँग जोड्ने कुरा हो । हामी झनै अघि बढेका छौँ । अरु भ्रम पार्ने भन्दा यही कुरा स्थापित गर्नुपर्छ । जनार्दन र घनश्यामजीहरु हामीसँगै हुनुहुन्छ, कम्युनिष्ट आन्दोलनको एउटा घुम्तीमा हुनुहुन्छ । हामी मूल बाटो लाग्यौँ । उहाँहरु घुम्तीमा अल्मलिनुभएको जस्तो छ । रेल छुटेको हो, विभिन्न स्टेशनमा रोक्दै नयाँ प्यासेन्जर चढाउँदै जाने हो । अर्को स्टेशनमा आउनुहुन्छ भन्ने विश्वास छ । १ सय ६५ निर्वाचन क्षेत्रमा उम्मेदवार उठाउँछौँ । जेन जी नवयुवाहरुसहितलाई लिएर यस पटक सबैभन्दा धेरै सिट लिनेगरी तयारी छ, आकंक्षा छ। हामी लार्जेस्ट पार्टी हुन्छौँ ।’
नेता पुनले आफूहरु एक भएर अघि बढ्ने प्रतिवद्धता जनाउनु भयो ।
