काठमाडौं । नेपाली कांग्रेसका नेता एवम पूर्वमन्त्री मोहम्मद अफताव आलमको ६३ वर्षको उमेरमा निधन भएको छ ।
एक महिनादेखि सिनामंगलस्थित काठमाडौं मेडिकल कलेजमा भर्ना भएका आलमको आज निधन भएको हो । उनको स्वास्थ्य अवस्था खराब भएपछि भेन्टिलेटरमा राखेर उपचार भइरहेका थियो ।
उच्च रक्तचाप, सुगरलगायत स्वास्थ्यमा समस्या देखिएपछि आलमलाई दसैंअघि देखि भर्ना गरिएको थियो । पछिल्लो एक सातादेखि आलमको स्वास्थ्यमा थप समस्या खराब बन्दै गएपछि भेन्टिलेटरमा राखेर उपचार भइरहेको थियो ।
आलमको डेढ महिना अघि भारतको नयाँ दिल्लीस्थित मेदान्त अस्पतालमा उपचार गराइएको थियो । त्यहाँ स्वास्थ्यमा सुधार आएपछि घर ल्यइएको थियो । तर केही समयपछि अवस्था खराव भएको हो ।
गएको जेठ १४ गते नख्खु कारागारबाट छुटेको केही दिनमै उनलाई मस्तिष्कघात भएपछि माइतीघरस्थित अन्नपूर्ण न्यूरो अस्पतालमा भर्ना गरिएको थियो । एक साता बढी आईसीयूमा राखेर उपचारपछि डिस्चार्ज भएका आलमलाई दसैंअघि थप उपचारको लागि भारत लगिएको थियो ।
पुरानै समस्या बल्झिएपछि आलमलाई केएमसी अस्पतालमा भर्ना गरिएको थियो ।
२०६४ चैत २७ गते पहिलो संविधानसभा निर्वाचनको पूर्व सन्ध्यामा रौतहटको राजपुरमा बम विस्फोटमा परेका यमुनामाई गाउँपालिका घर भएका घाइतेद्वय पिन्टु भनिने त्रिलोकप्रताप सिंह राजपुत र ओसी अख्तरलाई इँटाभट्टामा जलाएर हत्या गरेको कसुरमा जन्मकैदको सजाय पाएका पूर्वमन्त्री आलमसहित चार जनालाई उच्च अदालत जनकपुर, अस्थायी इजलास वीरगन्जका न्यायाधीशद्वय खुसीप्रसाद थारु र अर्जुन महर्जनको इजलासले रौतहटको फैसला उल्ट्याउदै गएको जेठ १४ गते सफाइ दिएको थियो ।
त्यसलगत्तै उनी नख्खु र भाइ महताब गौर कारागारबाट छुटेका थिए । आलमका दाजुभाइसहित शेख सराज र बद्री सहनीले पनि सफाइ पाएका छन् । झण्डै ६ वर्ष जेल बसेका आलमलाई नख्खुबाट बाहिरिएको केही दिन मै मस्तिष्कघात भएको थियो । जिल्ला अदालत रौतहटका तत्कालीन न्यायाधीश मात्रिकाप्रसाद आचार्यको एकल ईजलासले उनीहरुलाई २०८१ वैशाख १४ गते जन्मकैदको फैसला सुनाएको थियो ।
घटनामा फरार भनिएका मोहम्मद मोबिन, शेख फजले, शेख भदै, साहिल आलम र शेख जुमैको मुद्दा मुल्तवीमा राख्ने आदेश गरेका थिए । जन्मकैदको फैसला पछि आलम परिवार जिल्लाको आदेशविरुद्ध उच्च अदालत जनकपुरको वीरगन्ज इजलास पुगेका थिए ।
तत्कालीन कांग्रेस नेता शेख ईद्रिसको राजनिति उर्वर भूमिको रुपमा चित्रण गरिएको रौतहट क्षेत्र नम्बर २ मा आलमले लगातार चुनाव जित्दै आएका थिए । दोस्रो संविधानसभा निर्वाचनमा भने आफ्नै भान्जा मुस्ताक राजाले परास्त गरे । २०७४ को संसदीय निर्वाचनमा भान्जा मुस्ताकबाट राजनीतिक विरासत फिर्ता लिए । उनले उक्त क्षेत्रबाट ४ पटक प्रतिनिधित्व गरिसकेका छन् ।
उनको बुवा मोहम्मद सिद्धिकि बेदिल र मजबु नेसाको मृत्यु भइसकेको छ । आलमका दुई दाजु भाई हुन । उनको कान्छो भाई महताब आलम हुन् । महताब गाउँकै जनता माविमा पढाउँथे । शिक्षकबाट राजीनामा दिएर महताब पनि राजनीतिमा होमिए । दुई पटक कांग्रेसको जिल्ला सभापतिमा लडेर पराजित भए ।
