काठमाडौँ । ढल निकास प्रणालीमा सुधार गरेर काठमाडौं महानगरको बर्खे डुवान समाधान गर्ने बताउँदै काठमाडौं महानगरका प्रमुख बिद्यासुन्दर शाक्यले समस्या बुझ्न स्थानीयसँग र योजना कार्यान्वयन गर्न सम्बद्ध सरकारी निकायसँग छलफल चलिरहेको बताउनुभएको छ । यस क्रममा मेयर शाक्यले मंगलबार राष्ट्रिय सभा गृहमा वडा २८ बागबजार र पुतली सडक क्षेत्रका स्थानीयसँग योजनाका बिषयमा कुरा गर्नुभएको छ ।
वडा २८ का स्थानीयबासीले एउटै ठूलो योजना अघि बढाउँदा टुकुचा खोलाले नधानेर झन् डुवान पार्ने हो कि भन्ने चासोसहित मेयर शाक्यसँग बिकल्पसहितको योजना अघि बढाउन आग्रह गरेका थिए । त्यस क्रममा मेयर शाक्यले- टुकुचा, पुतलीसडकसहित आसपास क्षेत्रको बिद्यमान भौगोलिक सतह, ढल प्रणाली तयार गर्दाका प्राबिधिक पक्ष र स्थानीयको मागलाई बिश्लेषण योजना कार्यान्वयनको निर्णयमा पुग्ने बताउनुभयो । पुतलीसडकसँगै जमल पनि डुवान हुने क्षेत्र हो । यसलाई पनि हामी व्यवस्थित गर्छौं, मेयर शाक्यको भनाइ छ ।
पुतलीसडक क्षेत्रमा वडा ३ महाराजगञ्जदेखि वडा १ नक्सालहुँदै कमलपोखरी र डिल्लीबजारतर्फबाट बर्खे पानीको भेल आएर सानोतिनो पानी पर्नेबित्तिकै डुवान हुने गरेको छ । यसको समाधान भनेको – बर्खे सबै पानी अट्ने ढल प्रणाली निर्माण गर्नु नै हो । महानगरको भौतिक पूर्वाधार बिभागका प्रमुख राम थापा भन्नुहुन्छ- पुतली सडक चोकमा ठूलो मंगाल निर्माण गरेर त्यस माथिबाट आएको पानीलाई समानान्तर ढल प्रणालीबाट एकातिर बागबजारको मुखतर्फ र अर्कोतिर पुतलीसडक, शंकरदेव हुँदै तल्लो भेगमा निकास दिन सकिन्छ ।
छलफलमा वडा १ का अध्यक्ष भरतलाल श्रेष्ठ, वडा २८ का अध्यक्ष भाइराम खड्गी, वडा ३० का अध्यक्ष दलबहादर कार्कीसहित सरोकारवाला कार्यालयका प्रतिनिधिहरुको सहभागिता थियो ।
