काठमाडौं । संभावित कोरोना भाइरसको संक्रमणकोलाई लिएर मादक पदार्थ सेवन, मापसे जाँच पनि रोकिएको छ ।
सो कुराको जानकारी महानगरीय ट्राफिक महाशाखाका प्रमुख एसएसपी भीमप्रसाद ढकालले दिए । उनले मापसे जाँच रोकिएको जनाएका छन् । यद्यपि, अत्यवश्यक अवस्थामा भने अस्पतालमा लगेर परीक्षण गरेर आफन्तको जिम्मा लगाइने उनले जनाएका छन् ।
ट्राफिक प्रहरीले मापसे जाँच गर्दा पहिले जस्तो मेसिन लगाएर चेक नगर्ने तर पनि लरबराउँदै कोही आउँछ भने त्यस्ता व्यक्तिलाई अस्पताल लगेर परीक्षण गराउने नीति बनाएको बताइएको छ । त्यसैगरी ट्राफिकले मापसे गरेर जरिवानामा परेका व्यक्तिका लागि लिँदै आएको सचेतना कक्षा पनि हालका लागि स्थगित गरेको उपत्यका ट्राफिक प्रहरीले जनाएको छ ।
