![](https://newspolar.com/wp-content/uploads/2022/03/liverpool_Salah_2022-01_kxG3bfQfak.jpg)
इङलिस प्रिमियर लिगको उपाधि दौडमा रहेका लिभरपुल र चेल्सीबीच गएराति भएको खेल बराबरीमा टुङ्गिएको छ । खेलको पहिलो हाफमा दुबै टिमबाट २–२ गोल भएसँगै दुबै टिम अंक बाँड्न बाध्य भए ।
यस बराबरीसँगै लिभरपुलले २० खेलबाट ४२ अंक बनाएको छ भने २१ खेल खेलेको चेल्सीको ४३ अंक छ । लिगको शीर्ष स्थानमा रहेको म्यान्चेस्टर सिटीले भने २१ खेलबाट ५३ अंक जोडेको छ । अर्थात् अहिले दोस्रो स्थानमा रहेको चेल्सीभन्दा सिटीको अग्रता १० अंक भइसकेको छ ।
स्टाम्फोर्ड ब्रिज रंगशालामा करिब ४० हजार दर्शकबीच भएको खेलमा लिभरपुलले साडियो मानेको गोलबाट खेलको नवौं मिनेटमै अग्रता बनाएको थियो । फेरि २६औं मिनेटमा लिभरपुलकै मोहम्मद सलाहले टिमका लागि दोस्रो गोल गरेका थिए ।
तर त्यसपछि चेल्सी खेलमा फर्किएको थियो । चेल्सीका लागि ४२औं मिनेटमा म्याटिओ कोभासिकले पहिलो तथा पहिलो हाफको इन्जुरी समय अर्थात् ४६औं मिनेटमा क्रिस्टियन पुलिसिकले बराबरी गोल गरेका थिए ।