काठमाडौँ । युइएफए च्याम्पियन्स लिगको साविक विजेता फ्रान्सेली क्लब पेरिस सेन्ट जर्मेन (पीएसजी)ले जर्मनीको लेभरकुसेनमाथि ७–२ को सहज जित निकालेको छ ।
खेलको सुरुदेखि नै आक्रामक देखिएको पीएसजीका लागि ६ फरक खेलाडीले गोल गरे । पीएसजीका लागि युवा स्टार देसिरे डोउएले ४१औं र ४८औं मिनेटमा दुई गोल गरे । अन्य गोलहरूमा विलियन पाचो, खभिका क्वारात्स्केलिया, नुनो मेन्डेस, उस्मान डेम्बेले र भिटिन्हाले एक–एक गोल गरे।
लेभरकुसनका लागि भने एलेक्स गार्सियाले दुई गोल गरे, जसमा उनले ३८औं मिनेटमा पेनाल्टी र ५४औं मिनेटमा अर्को गोल गरेका थिए।
त्यसअघि ३३औं मिनेटमा लेभरकुसनका रोबर्ट एन्ड्रिचले रातो कार्ड खाएर मैदानबाट बाहिरिएपछि टिम १० खेलाडीमा सीमित भयो । यद्यपि त्यसको केही समयपछि नै अर्थात् ३७ औं मिनेटमा पीएसजीका इलिया जाबार्नीले पनि रातो कार्ड पाएका थिए ।
