काठमाडौँ । नेकपा (एमाले)का अध्यक्ष केपी शर्मा ओलीले कसैले भन्दैमा आफूले पार्टी अध्यक्षको पद नछोड्ने स्पष्ट घोषणा गरेका छन् ।
मंगलबार बसेको एमाले केन्द्रीय कमिटी बैठकलाई सम्बोधन गर्दै अध्यक्ष ओलीले आफू बस्ने वा हट्ने निर्णय फेसबुक वा सामाजिक सञ्जालले होइन, पार्टीको आधिकारिक संरचनाले गर्ने बताए ।
“मैले हट्नुपर्छ कि पर्दैन भन्ने फेसबुकले होइन, यो कमिटीले भन्नुपर्छ,” उनले भने, “यो कमिटीले भन्छ भने यसको आदेशमा जनुसुकै निर्णय गर्न तयार छु।”
ओलीले आफू कुनै पनि परिस्थितिमा विचलित नहुने स्वभावको भएको उल्लेख गर्दै पार्टीका केही नेताहरू लोकप्रियताको पछाडि लागेको टिप्पणी पनि गरे ।
उनले एमालेलाई मन नपराउने शक्तिहरूले च्यासलस्थित पार्टी कार्यालय र नेताहरूका घरमा आगजनी गरेको आरोप लगाए ।
विरोधीहरूले पार्टीको एकता र संगठनलाई कमजोर पार्ने उद्देश्यले यस्तो कार्य गरेको उनको भनाई छ ।
