काठमाडौँ । नेकपा माओवादी केन्द्रको महासचिवका प्रमुख प्रत्याशी वर्षमान पुनले आफूले महासचिव पदमा दावी कायम राख्नुभएको छ । उहाँले आफ्नो नाममा सहमति नजुटे आफ्नो तर्फबाट शक्ति बस्नेतलाई अगाडि सार्नुभएको छ ।
हाल चीनमा उपचार गराइरहनुभएका पुनले केन्द्रीय समितिको बैठक बस्नुअघि अध्यक्ष पुष्पकमल दाहाल प्रचण्डलाई फोन गरी आफू भोलि मङ्गलबार डिस्चार्ज हुने जानकारी गराउँदै पदाधिकारी चयन प्रक्रिया रोक्न आग्रह गर्नुभएको थियो ।
यदि प्रक्रिया नै अगाडि बढाउने हो भने आफूले महासचिवको दावी नछोड्ने तर सहमतिका लागि छाड्ुन परे शक्ति बस्नेतलाई दिनु पर्ने अडान राख्नुभएको थियो । पार्टीभित्र पुनका प्रतिस्पर्धी जर्नादन शर्मा पनि महासचिवका लागि प्रबल दावेदार हुनुहुन्छ । तर उहाँहरु एकले अर्काको अस्तित्व स्वीकार्नुहुन्न ।
शर्मा र पुनलाई मिलाउन सकस भएपछि अध्यक्ष प्रचण्डले देव गुरुङलाई महासविचका लागि अगाडि सार्ने मनस्थिति बनाउनुभएको छ । तर गुरुङ निकट एक नेता भन्छन्, “अध्यक्षज्युले पुनको कुरा नमानेर अगाडि बढने सम्भावन न्यून छ त्यसैले पुन वा पुनले चाहेको व्यक्ति महासचिव बन्ने प्रबल सम्भावना छ ।”