काठमाडौँ । तत्कालीन गृहमन्त्री एवं नेपाली काँग्रेसका नेता रमेश लेखकले जेन–जी आन्दोलनका क्रममा भएको हिंसा र धनजनको क्षतिका विषयमा अध्ययन गर्न गठित उच्चस्तरीय जाँचबुझ आयोगलाई लोकतान्त्रिक मूल्य र कानूनी दायराभित्र बसेर आफ्नो कार्यसम्पादन गर्न आग्रह गर्नुभएको छ ।
शुक्रवार पार्टी केन्द्रिय सानेपामा सञ्चारकर्मीहरुसँग कुरा गर्दै उहाँले यस्तो आग्रह गर्नुभएको हो । सरकार, छानविन आयोग र राजनीतिक दलहरुले लोकतान्त्रिक मूल्यमान्यता, संविधान र कानूनको अधिनभित्र रहेर आ—आफ्नो कार्यसम्पादन गर्नुपर्ने उहाँको भनाइ छ ।
गत २३ र २४ भदौमा भ्रष्टाचार, नातावाद र सामाजिक सञ्जालमाथिको प्रतिवन्धविरुद्ध जेन–जी युवाहरुले आन्दोलन गरेका थिए । आन्दोलनले हिंसात्मक रुप लिँदा ७३ जनाको मृत्यु भएको थियो । सयौं घाइते भएका थिए । नेता लेखकले मुलुक राजनीतिक जटिलतातर्फ धकेलिएको उल्लेख गर्दै यस अवस्थामा कानूनी साशनको मान्यताभित्र बसेर सबैले अगाडि बढ्न आवश्यक रहेको बताउनु भयो ।
उहाँले भन्नुभयो,‘सरकार, छानविन आयोग र राजनीतिक दलहरुले हाम्रा लोकतान्त्रिक मूल्यमान्यताभित्र बसेर संविधान र कानूनभित्र बसेर आआफ्ना कामहरु सम्पादन गर्नुपर्छ । कानूनी साशनको मान्यताभित्र बसेर आफ्नो कामहरु अगाडि बढाऔँ भन्ने मेरो आग्रह छ ।’
सरकारले गत २३ र २४ भदौमा भएको जेन—जी आन्दोलनका क्रममा भएका दमन र लुटपाटको छानविन गर्नका लागि विशेष अदालतका पूर्वन्यायाधीश गौरीबहादुर कार्कीको नेतृत्वमा उच्चस्तरीय जाँचबुझ आयोग गठन गरेको छ ।
