काठमाडौँ । नेकपा एमालेका नेता योगेश भट्टराईले प्रतिनिधि सभा सदस्यको हैसियतमा लिएको कूटनीतिक राहदानी (रातो पासपोर्ट) फिर्ता गरेका छन् ।
भट्टराईले बिहीबार राहदानी विभागमै पुगेर पासपोर्ट फिर्ता गरेको जानकारी दिएका छन् । गत भदौ २७ गते प्रतिनिधि सभा विघटन भएपछि पूर्वसांसदहरूले तोकिएको कानूनी प्रावधानअनुसार राहदानी फिर्ता गर्नुपर्ने हुन्छ ।
राहदानी नियमावली २०७७ को नियम १८ अनुसार पदमा नरहेको व्यक्तिले एक महिनाभित्र कूटनीतिक वा विशेष राहदानी फिर्ता गर्नुपर्छ । उक्त नियममा भनिएको छ— पदबाट अलग भएको व्यक्ति वा विदेशमा रहेका हकमा नेपाल फर्किएको मितिले एक महिनाभित्र आफ्नो तथा परिवारका सदस्यको नाममा जारी राहदानी विभागमा बुझाउनुपर्नेछ ।
समयमै राहदानी फिर्ता नगरेको अवस्थामा विभागले सो राहदानी रद्द गर्न सक्ने व्यवस्था पनि सोही नियमावलीको उपनियम ३ मा उल्लेख छ ।
सांसदहरूले संघीय संसद् सचिवालयमार्फत समेत रातो पासपोर्ट फिर्ता गर्न सक्ने व्यवस्था छ । सचिवालयका अनुसार हालसम्म निवर्तमान सांसद प्रतिमा गौतम, रमा कोइराला पौड्याल, सपना राजभण्डारी, रघुजी पन्त, कान्तिका सेजुवाल र तोसिमा कार्कीले पनि आफ्नो राहदानी फिर्ता गरिसकेका छन् ।
