काठमाडौं । नेपाली कांग्रेसका महामन्त्री विश्वप्रकाश शर्माले अब संसद् पुनःस्थापनाको माग राख्न आवश्यक नरहेको बताएका छन् ।
सोमबार काठमाडौंमा आयोजित एक कार्यक्रममा बोल्दै उनले निर्वाचनको मिति घोषणा भइसकेकाले दलहरूले चुनावमै जानुपर्ने धारणा राखे ।
महामन्त्री शर्माले संसद् विघटनबारे पार्टीभित्र फरक–फरक मत रहेको उल्लेख गर्दै भने, “संसद् पुनःस्थापनामा जानुपर्छ भन्ने मत पनि छन्, चुनावमा जानुपर्छ भन्ने नेताहरू पनि हुनुहुन्छ। तर, मेरो धारणा अब निर्वाचनको मिति घोषणा भइसकेकाले पुनःस्थापनाको माग गर्नु उपयुक्त हुँदैन ।”
उनका अनुसार अफ्ठ्यारो परिस्थितिमा राष्ट्रपतिले सेनालाई विश्वासमा राख्दै नयाँ सरकार बनाएर निर्वाचनमा जान दलहरूलाई आह्वान गरेको अवस्थालाई स्वीकार गर्नुपर्ने समय आएको छ ।
सो अवसरमा उनले जेनजीले उठाएको प्रतिनिधित्वको मागप्रति समर्थन जनाउँदै सुशीला कार्की नेतृत्वको सरकारले जेनजीलाई सहभागी नगराएको विषयमा प्रश्न उठाए ।
उनले भने, “बलिदान दिने बेला जेनजी, परिवर्तनको लागि लड्ने बेला जेनजी, तर सरकार बनाउने बेला जेनजीको प्रतिनिधित्वबिना अघि बढाइयो, यो गम्भीर विषय हो ।”
