काठमाडौँ । सरकारले रामेश्वर दंगाललाई नयाँ गृहसचिव नियुक्त गरेको छ ।
जेन–जी आन्दोलन दमनमा संलग्न भएको आरोप लागिरहेका तत्कालीन गृहसचिव गोकर्णमणि दुवाडीलाई हटाएर दंगाललाई जिम्मेवारी तोकिएको हो । दुवाडीलाई योजन आयोग सचिवालयमा सरुवा गरिएको स्रोतले जनाएको छ ।
यसअघि रक्षासचिवका रूपमा कार्यरत दंगाल गृह प्रशासनकै ‘क्याडर’ मानिन्छन् । प्रधानमन्त्री तथा मन्त्रिपरिषद् कार्यालय स्रोतका अनुसार मंगलबार वा बुधबारभित्र निर्णय कार्यान्वयनमा आउनेछ ।
भिजिट भिसा प्रकरणमा नाम मुछिएका भए पनि उन्मुक्ति पाएका दुवाडी सरकार परिवर्तनपछि करिब डेढ सातासम्म गृहसचिवका रूपमा निरन्तर रहेका थिए । तर, जेन–जी आन्दोलनको दमनका क्रममा गृह प्रशासनको नेतृत्व गरेको भन्दै उनको छानबिन हुनुपर्ने आवाज उठिरहेका बेला सरकार निर्णयमा पुगेको हो ।
