काठमाडौँ । सामाजिक सञ्जाल प्रतिबन्ध र भ्रष्टाचारविरुद्ध जेनजी पुस्ताले आह्वान गरेको प्रदर्शनलाई नियन्त्रण गर्ने क्रममा भएको प्रहरी हस्तक्षेपबारे राष्ट्रिय मानव अधिकार आयोगले गम्भीर ध्यानाकर्षण गराएको छ ।
आयोगले आज एक प्रेस विज्ञप्ति जारी गर्दै काठमाडौँसहित देशका विभिन्न शहरमा भएको प्रदर्शनमा प्रहरीद्वारा लाठीचार्ज, पानीको फोहोरा, अश्रुग्याँस र गोली प्रयोग भएको भन्दै आपत्ति प्रकट गरेको हो ।
आयोगको अनुगमनका क्रममा प्राप्त विवरणअनुसार प्रहरीको गोली लागी दर्जनौँ व्यक्तिको मृत्यु भएको र धेरैजना घाइते भएका छन् ।
आयोगले मृतकहरूप्रति श्रद्धाञ्जली अर्पण गर्दै घाइतेहरुको निःशुल्क उपचार र शीघ्र स्वास्थ्य लाभको कामना गरेको छ । साथै, मृतकका परिवारलाई तत्काल राहत र क्षतिपूर्ति दिन सरकारलाई आग्रह गरिएको छ ।
आयोगले विज्ञप्तिमा भनेको छ, “संविधान र अन्तर्राष्ट्रिय मानव अधिकार कानूनले प्रत्येक नागरिकलाई शान्तिपूर्ण रुपमा विमति राख्ने अधिकार दिएको छ । त्यसैले सरकारले नागरिकका आवाजलाई समयमै सम्बोधन गर्नुपर्छ, तर प्रदर्शन तोडफोडमा बदलिनु र सुरक्षाकर्मीले अत्यधिक बल प्रयोग गर्नु दुःखद छ ।”
मानव अधिकार आयोगले नेपाल सरकारलाई प्रदर्शन नियन्त्रणका क्रममा अत्यधिक बल प्रयोग नगर्न, मृतकका परिवारलाई तत्काल राहत र क्षतिपूर्ति उपलब्ध गराउन, घाइतेहरुको निःशुल्क उपचार सुनिश्चित गर्न, घटनाबारे निष्पक्ष र विश्वसनीय अनुसन्धान गरी दोषीमाथि कडा कारबाही गर्न निर्देशन दिएको छ ।
त्यसैगरी, प्रदर्शनलाई शान्तिपूर्ण, मर्यादित र संयमित बनाउन प्रदर्शनकारी पक्षलाई समेत आयोगले जिम्मेवारीपूर्वक आह्वान गरेको छ ।
काठमाडौँ, पोखरा, बुटवल, चितवन, बिराटनगर, रौतहट, सुनसरी, झापा, दाङलगायतका सहरमा प्रदर्शन भएको आयोगले जनाएको छ ।
काठमाडौँमा माइतीघरबाट सुरु भएको प्रदर्शन संसद भवनतर्फ अगाडि बढ्दा प्रहरीसँग भिडन्त भएको थियो ।
