काठमाडौ । नेकपा (एमाले)का सांसद पदम गिरिले प्रतिपक्षी दलहरुले सरकारको गरिरहेको काम कारबाहीको बारेमा जनता भ्रम छर्ने काम गरिरहेको आरोप लगाउनुभएको छ ।
प्रतिनिधि सभाको शुक्रवारको बैठकमा बोल्दै सांसद गिरीले यस्तो आरोप लगाउनुभएको हो ।सरकारका कामलाई लिएर सिर्जनात्मक आलोचना गर्न कसैलाई नरोकिएको भएपनि संसद र सामाजिक सञ्जालमार्फत सरकारप्रति जनतामा अनावश्यक भ्रम छर्ने कार्य भइरहेको भन्दै उहाँले आपत्ति जनाउनु भयो । उहाँले सरकारले बिग्रिएको अर्थतन्त्र सही दिशामा अगाडि बढाइरहेको जिकिर गर्नुभयो । तथ्य र तथ्यांकमा टेकेर नभई सरकारले देश नै लुटिसक्यो जस्तो आफ्नो राजनीिितक रोटी सेक्नेगरी भ्रम छर्ने कार्य बन्द गर्न चेतावनी समेत दिनुभयो ।
उहाँले भन्नुभयो, ‘अहिले संसदभित्र मात्र होइन संसदबाहिर सामाजिक सञ्जालमा पनि सरकारले गरेका कामहरुलाई लिएर सिर्जनात्मक आलोचना गर्न कसैलाई रोकिएको छैन । सरकारले गरेका कमि कमजोरीहरुलाई औंल्याउनका निम्ति, सरकारलाई खबरदारी गर्नका निम्ति, सरकारले बाटो बिराएको छ भने ठिक ढंगले बाटो देखाउनका निम्ति प्रतिपक्षी दलहरुले खबरदारी गर्नैपर्छ । लोकतन्त्रको सौन्दर्य भनेको त्यही हो । तर यहाँ तथ्य र तर्कसंगत रुपमा होइन । आग्रहको आधारमा आफ्नो स्वार्थको रोटि सेक्नका निम्ति सरकारले सारा लुटिसक्यो, देशमा लुट मच्चिएको छ । भ्रष्टाचार र अनियमितता मौलाएको छ । वास्तवमा भन्ने हो भने देश बर्बाद भएको जस्तो किसिमले जनता भ्रमहरु सिर्जना गरिँदै छ । आर्थिक वर्ष २०८१/८२ का आर्थिक परिसूचकहरु कसरी आए ? त्यसको रिपोर्ट के छ ? हाम्रो तथ्यांक त त्यही होला नि । त्यसमा उभिएर हेर्नुुपर्ये लुट मच्चिएको छ कि बिग्रिएको अर्थतन्त्र सही बाटोमा फर्किएको छ भन्ने कुरा हेर्न ?’
उहाँले आर्थिक वर्ष २०८१/८२को आर्थिक परिसूचक हेर्न समेत प्रतिपक्षी दलहरुलाई आग्रह गर्नुभयो ।
