काठमाडौं– राष्ट्रिय प्रजातन्त्र पार्टी (राप्रपा) का अध्यक्ष राजेन्द्रप्रसाद लिङदेनले राजनीतिक दलहरूले अवलम्बन गरेको ‘निषेधको राजनीति’ ले देशलाई अँध्यारो सुरुङतर्फ धकेलेको टिप्पणी गर्नुभएको छ।
काठमाडौंको खुलामञ्चमा जारी नेपाली कांग्रेसको १५औँ महाधिवेशनलाई आइतबार सम्बोधन गर्दै अध्यक्ष लिङदेनले वर्तमान राजनीतिक व्यवस्था र संविधानका कमजोरीमाथि प्रश्न उठाउँदै मुलुकलाई निकास दिन राष्ट्रिय सहमतिको आवश्यकता रहेको बताउनुभयो।
उहाँले पछिल्लो पाँच वर्षको राजनीतिक यात्राको समीक्षा गर्दा आम नागरिकमा नेता र राजनीतिप्रतिको वितृष्णामा अपेक्षित सुधार आउन नसकेको दाबी गर्नुभयो। समस्या राजनीतिक पात्रमा मात्रै नभई विद्यमान शासन व्यवस्था र संविधानका कमजोरीमा समेत रहेको उहाँको भनाइ थियो।
लिङदेनले संविधानलाई अपरिवर्तनीय ग्रन्थका रूपमा बुझ्न नहुने बताउँदै समयअनुसार देखिएका कमजोरी सच्याउँदै अघि बढ्नुपर्नेमा जोड दिनुभयो।
‘पाँच वर्षपछि फेरि नेपाली कांग्रेसको १५औँ महाधिवेशनमा आइपुग्दा पनि आम जनतामा राजनीति र नेताप्रतिको वितृष्णामा अपेक्षित सुधार आएको छैन। देश झन् जटिल राजनीतिक अवस्थातर्फ गइरहेको छ,’ उहाँले भन्नुभयो, ‘पात्र फेरिए, तर प्रवृत्ति अझै उस्तै छ। त्यसैले समस्या व्यक्तिमा मात्र होइन, व्यवस्था र संविधानका कमजोरीमा पनि छन्।’
उहाँले देश बिग्रँदा कुनै एउटा दल मात्रै प्रभावित नहुने भन्दै निषेधको राजनीति त्यागेर संवाद, सहकार्य र राष्ट्रिय सहमतिको बाटोमा अघि बढ्नुपर्ने बताउनुभयो।
‘संविधान कुनै अपरिवर्तनीय ग्रन्थ होइन। समयअनुसार देखिएका कमजोरी सुधार्दै जानुपर्छ,’ लिङदेनले भन्नुभयो, ‘अब कसैले नहार्ने र सिङ्गो देशले जित्ने राष्ट्रिय सहमति आवश्यक छ।’
अध्यक्ष लिङदेनले राजतन्त्रवादीदेखि नयाँ पुस्तासम्म सबै राजनीतिक धारलाई एउटै टेबुलमा राखेर राष्ट्रिय समझदारी निर्माण गर्नुपर्नेमा जोड दिनुभयो। उहाँले २००७ सालको प्रजातन्त्र, २०४६ सालको बहुदलीय व्यवस्था, २०६२/६३ को समावेशी लोकतान्त्रिक परिवर्तन तथा पछिल्लो पुस्ताले उठाएका आकांक्षालाई संरक्षण गर्दै नयाँ समझदारीका साथ देशलाई अघि बढाउनुपर्ने बताउनुभयो।
