काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले नेपाली कांग्रेसको सबैभन्दा ठूलो शक्ति उसको लामो राजनीतिक इतिहास रहेको बताएका छन्।
नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै लामिछानेले लोकतन्त्र र राजनीतिक परिवर्तनका लागि कांग्रेसले गरेको योगदानको सम्मान गर्दै त्यसबाट नयाँ पुस्ताले सिक्नुपर्ने बताएका हुन्।
उनले कांग्रेसको इतिहास गौरव गर्ने विषय मात्रै नभई आगामी राजनीतिक यात्राका लागि सिकाइको स्रोतसमेत हुनुपर्ने बताए। कांग्रेसका उपलब्धिसँगै विगतका कमजोरीबाट पनि पाठ सिकेर अघि बढ्नुपर्ने उनको भनाइ थियो।
‘नेपाली कांग्रेसको शक्ति इतिहास हो, कमजोर पनि इतिहास हो। कांग्रेसको इतिहासबाट पाठ सिक्नैपर्छ। यसमा हामी पाठ सिकेर अगाडि बढ्नेछौँ,’ उनले भने।
लामिछानेले आफू सत्तापक्षमा भए पनि कांग्रेसको महाधिवेशनको मञ्चमा एक्लो प्रतिपक्षीजस्तो देखिएको भन्दै व्यंग्यसमेत गरे। ‘आज यो मञ्चको एक्लो प्रतिपक्षी भएछु। सत्तापक्ष तर यो मञ्चको एक्लो प्रतिपक्ष। प्रायः एक्लो हुने बानी पनि छ मलाई,’ उनले भने।
उनले कांग्रेसले नयाँ पुस्तालाई समयमै नेतृत्व र अवसर दिएको भए आफू पनि कांग्रेसमै हुन सक्ने संकेत गरे। राजनीतिक दलहरूले नयाँ पुस्ताको आकांक्षा र परिवर्तनको चाहनालाई सम्बोधन गर्नुपर्ने उनको भनाइ थियो।
लामिछानेले राजनीतिक दलहरू भाषण, नारा र घोषणापत्रमा मात्र सीमित हुन नहुने बताए। जनताले अब राजनीतिक दलका प्रतिबद्धताभन्दा काम र परिणाम हेर्न थालेको उल्लेख गर्दै उनले काम गर्न नसके निर्वाचनमार्फत जनताले निर्णय गर्ने बताए।
राष्ट्रिय हितका विषयमा भने राजनीतिक दलबीचको विभाजन गौण हुनुपर्ने उनले बताए। ‘पार्टीको कुरा होइन, मुलुक र देशको कुरा आउँछ त्यतिबेला पार्टी र झन्डा फरक हुँदैन,’ उनले भने।
वर्तमान सरकार कमजोर भएको चर्चा हुने गरेको उल्लेख गर्दै लामिछानेले सरकार नढल्ने दाबी गरे। सरकार परिवर्तनको अधिकार राजनीतिक दलभन्दा जनतासँग रहेको उनको भनाइ थियो। ‘सरकार कमजोर भयो भन्ने पनि सुनिन्छ। यो सरकार ढल्दैन, नढलेपछि अरू ढल्छन्,’ उनले भने।
लोकतन्त्रको ठेक्का कुनै एक दलले लिन नहुने भन्दै उनले लोकतन्त्र संकटमा परे त्यसको रक्षा जनताले गर्ने बताए। आफूहरूलाई हटाउने वा विस्थापित गर्ने अधिकार पनि निर्वाचनमार्फत जनतामै रहेको उनले स्पष्ट पारे।
‘लोकतन्त्रको ठेक्का नलिनुस्, लोकतन्त्र खतरामा परे जनताले जोगाउँछन्। हामीलाई हटाउन, विस्थापन गर्न चुनावले मात्रै सक्छ,’ लामिछानेले भने।
आफूहरूले काम गर्न नसके आगामी निर्वाचनमा जनताले अस्वीकार गर्ने कुरा स्वीकार गर्न तयार रहेको पनि उनले बताए। लोकतान्त्रिक व्यवस्थाको रक्षा र त्यसका मूल्य–मान्यताको संरक्षणमा सबै राजनीतिक शक्तिको साझा जिम्मेवारी रहेको उनको भनाइ थियो।
