काठमाडौ । नेकपा (एमाले)का सांसद ठाकुर गैरेले देशभरका वडा कार्यालयहरुमा जेष्ठ नागरिक तथा सामाजिक सुरक्षा भत्ता पाउँदै आएका नागरिकले बायोमेट्रिक प्रक्रियामा दुःख पाइरहेको भन्दै सरकारको ध्यानाकर्षण गराउनुभएको छ ।
प्रतिनिधि सभाको शुक्रवारको बैठकमा बोल्दै उहाँले सरकारले प्रयोग गर्दै आएको सर्भर डाउन हुने समस्याका कारण आम नागरिकले दुःख पाइरहेकोप्रति सरकारको ध्यानाकर्षण गराउनुभएको हो । उहाँले सरकारले प्रयोग गरेको सर्भर क्षमता र गुणस्तरमै प्रश्न उठिरहेको उल्लेख गर्दै यसको समाधानका लागि आवश्यक कदम चाल्न उहाँले माग गर्नुभयो ।
उहाँले भन्नुभयो, ‘अहिदे देशभरीका सबै वडा पालिकाहरुमा यो ज्येष्ठ नागरिकहरु र सामाजिक सुरक्षा भत्ता पाइराख्नुभएका नागरिकहरु बायोमेट्रिक गर्न वडा कार्यालयहरुमा धाइराख्नुभएको छ । म यसबीचमा धेरै वडाहरुको भ्रमण गर्न जाँदा वडा कार्यालयहरु अशक्त जेष्ठ नागरिकहरु भरिभराउ अवस्थामा हुनुहुन्छ । दुई तीन दिनसम्म पनि काम भएन । किन यस्तो समस्या भयो भन्दाखेरी यसको उत्तर एउटै छ–सर्भर डाउन भयो । नेपाल सरकारले गरिद गरेको सर्भरको क्षमता कम भएर हो वा गुणस्तरीय भएर हो ? नभए यस्तो किन भइरहेको छ ? यसको समाधानको निम्ति किन पहल भइरहेको छैन । र त्यस्ता जेष्ठ नागरिक र असशक्तहरुलाई घरमै गएर सेवा प्रदान गर्न किन सकिदैन भन्नेतर्फ सरकारको ध्यानाकर्षण गराउन चाहन्छु । र सर्भर समस्याको समाधान तत्काल खोज्न समेत माग गर्न चाहन्छु ।’
सांसद गैरेले अशक्त र ज्येष्ठ नागरिकलाई घरमै पुगेर सेवा प्रदान गर्ने व्यवस्था गर्न समेत उहाँले सरकारसँग माग गर्नुभयो ।
