काठमाडौं । काठमाडौं महानगरपालिका वडा नं. ३२ जडिबुटीमा रोकिराखेको बसको पछाडि स्कुटर ठोकिँदा दुई युवकको मृत्यु भएको छ ।
जडिबुटीको आकाशेपुलनजिकै रोकिएको बा.प्र ०१–००६ ख ४२४३ नम्बरको अरनिको यातायातको बसको पछाडि आज बिहान करिब तीन बजेतिर लु.४३ प ४९३८ नम्बरको स्कुटर ठोक्किएको हो ।
कोटेश्वरबाट जडिबुटीतर्फ जाँदै गरेको स्कुटर बसमा ठोकिँदा दुई युवकको मृत्यु भएको जिल्ला प्रहरी परिसर काठमाडौँले जनाएको छ ।
मृत्यु हुनेमा स्कुटर चालक नवलपरासीको सुनौल नगरपालिका–१ स्थायी घर भई हाल भक्तपुरको लोकन्थली बस्दै आएका २२ वर्षीय शिरिस पौडेल र काभ्रेको पाँचखान नगरपालिका–२ होस्के घर भएका २३ वर्षीय नितेश नेपाल रहेका छन् ।
दुर्घटनामा गम्भीर घाइते भएका उनीहरूलाई उपचारको लागि तत्काल ट्रमा सेन्टर लगिएको थियो । पौडेलको उपचारको क्रममा शुक्रबार बिहान साढे तीन बजे र नेपालको बिहान पौने चार बजे मृत्यु भएको हो ।
घटनामा संग्लन दुवै सवारी साधन कोटेश्वर ट्राफिकको नियन्त्रणमा छन् ।
