सुर्खेत । दैलेखमा १२ वर्षीया बालिकालाई बलात्कार गरेको आरोपमा दुई जना पक्राउ परेका छन् । चामुण्डा बिन्द्रासैनी नगरपालिकामा साउन २२ गते राति तिजको कार्यक्रम हेर्न गएकी बालिका बलात्कृत भएकी हुन् ।
पक्राउ पर्नेमा चामुण्डाबिन्द्रासैनी–८ का २३ वर्षीय गोविन्दबहादुर शाही र २५ वर्षीय खगेन्द्र भण्डारी रहेका छन् । उनीहरूले १२ वर्षीया बालिकालाई पालैपालो बलात्ककार गरेको प्रहरी अनुसन्धानको क्रममा खुलेको जिल्ला प्रहरी कार्यालय दैलेखका प्रमुख डिएसपी गणेश बरालले जानकारी दिए ।
साउन २२ गते राति तीजको नाच हेरेर एकै उमेरका ४/५ जना किशोरीको समूह घर फर्किदै गर्दा गोविन्द र खगेन्द्रले उनीहरूलाई पिछा गरेका थाहा पाएपछि किशोरीहरू भागेका थिए । त्यहीमध्येकी एक किशोरी भाग्ने क्रममा लडेपछि उनलाई पालैपालो बलात्कार गरेको पाईएको प्रहरीले जनाएको छ ।
पीडित बालिकाका आफन्तले शुक्रबार प्रहरीमा दिएको जाहेरीका आधारमा ती युवाहरूलाई पक्राउ गरिएको डिएसपी बरालले जानकारी दिए ।
घटनापश्चात बालिकालाई उपचारका लागि अस्पताल पुर्याइएको थियो । उनको जिल्ला अस्पतालमा उपचार भइरहेको र अवस्था सामान्य रहेको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
