पोखरा। जिल्ला प्रहरी कार्यालय कास्कीले ६ किलो ४ सय ग्राम अवैध सुनसहित ११ जना भारतीय नागरिकलाई शुक्रबार पक्राउ गरेको छ। उनीहरूको साथबाट पाँच लाख १४ हजार ६ सय ६५ रुपैयाँ नगद पनि बरामद गरिएको प्रहरीले जनाएको छ।
गोप्य सूचनाका आधारमा अवैध सुन–चाँदीको कारोबार भइरहेको शंका लागेपछि पोखरा महानगरपालिका–२, ३, ४ र ९ का विभिन्न स्थानमा छापा मारेर उनीहरूलाई पक्राउ गरिएको हो।
पक्राउ पर्नेमा भारत महाराष्ट्रका ४१ वर्षीय राजेन्द्र रामचन्द्र जगताप, ४० वर्षीया सुनिता पवार, कोलकत्ताका ४५ वर्षीय मनिकलाल आदक, ३५ वर्षीय असित वर, ४४ वर्षीय तापस सामन्त, ३८ वर्षीय उज्वल भोमिक, पश्चिम बंगालका ३५ वर्षीय सन्दिप ढाव, ४१ वर्षीय सोमनाथ पाल, ४७ वर्षीय दीपक सामन्त, ४७ वर्षीय गोविन्दा दिण्डा र ४९ वर्षीय प्रोभास माझी रहेका छन्।
प्रहरीका अनुसार उनीहरूबाट ५४९ तोला ४० लाल सुन र ४४४ तोला ७३ दशमलव ९ लाल चाँदी बरामद भएको छ। पक्राउ परेकाहरुलाई बरामद सुन, चाँदी र नगदसहित थप अनुसन्धान तथा कारबाहीका लागि राजश्व अनुसन्धान कार्यालय बुटवल पठाइने प्रहरीको भनाइ छ। यसअघि पनि प्रहरीले अवैध सुन–चाँदीसहित भारतीय नागरिकलाई पटक–पटक पक्राउ गरेको छ।
