सिरहा । नालाको भुक्तानी दिनेक्रममा घुस लिएको ठहर गर्दै अख्तियार दुरुपयोग अनुसन्धान आयोगले कल्यापुर नगरपालिकाका मेयर रामपुकार साह तेलीविरुद्ध भ्रष्टाचार मुद्दा दायर गरेको छ ।
नगरपालिकाको वडा नम्बर ६ मा निर्माण गरिएको नालाको ठेक्का वापतको भुक्तानी दिनेक्रममा एक लाख रुपैयाँ घुस लिएको ठहर गर्दै अख्तियारले मेयर तेलीविरुद्ध विशेष अदालतमा मुद्दा दायर गरेको हो ।
यसअघि बर्दिबास कार्यालयबाट खटिएको अख्तियारको टोलीले साहलाई बिचौलियामार्फत घुस लिएको रकमसहित नियन्त्रणमा लिएको थियो । उजुरी निवेदनका आधारमा थप अनुसन्धान गर्दै जाँदा मेयर साहले कल्याणपुर नगरपालिका–६ स्थित पक्की नालाको निर्माणपश्चातको भुक्तानी दिने क्रममा सेवाग्राहीसँग एक लाख रुपैयाँ घुस लिएको पुष्टि भएको हो ।
उनीविरुद्ध भ्रष्टाचार निवारण ऐन, २०५९ अनुरुप एक लाख रुपैयाँ बिगो कायम गरी जरिबाना र कैद सजायको माग गर्दै आरोप पत्र दायर गरिएको छ ।
