काठमाडौँ । पहिले गुण्डा नाइकेका रुपमा परिचित चक्रे मिलन भनिने मिलन गुरुङलाई प्रहरीले पक्राउ गरेको छ ।
गएराति जिल्ला प्रहरी परिसर, काठमाडौं र उपत्यका अपराध अनुसन्धान कार्यालयको टोलीले महाराजगञ्ज क्षेत्रबाट उनलाई नियन्त्रणमा लिएको हो ।
चक्रे मिलन आफ्नो जन्मदिन मनाउन बाँसबारी रोडमा रहेको होटल साम्बालामा पुगेका थिए ।
मिलनसहित उनका सहयोगीलाई त्यहाँबाट नियन्त्रणमा लिइएको प्रहरीले जनाएको छ ।
प्रहरी स्रोतका अनुसार, चक्रे मिलनका समर्थकहरुले दुई दिनअघिबाटै जन्मदिन पार्टी मनाइरहेका थिए । त्यसक्रममा बिहीबार दिउँसो उनी पशुपति क्षेत्रमा देखा परेका थिए ।
दिउँसो मन्दिर आसपास सहयोग माग्दै बसेका व्यक्तिहरुलाई पैसा बाँड्दै हिँडेको भिडियो टिकटकमा समेत भाइरल भएको थियो ।
पछिल्लो समय कुनै आपराधिक गतिविधिमा प्रत्यक्ष संलग्नता नदेखिएका मिलन सार्वजनिक स्थानमा हल्लाखल्ला गरेको आरोपमा पक्राउ परेको बुझिएको छ ।
तर, उनीहरुविरुद्ध के कसुरमा प्रहरीले मुद्दा चलाउँछ भन्ने टुंगो लागेको छैन ।
