काठमाडौं । अर्थमन्त्रीद्दारा प्रस्तुत ७८/७८ को बजेटले निजामती कर्मचारीहरूको भत्ता लगायतका फजुल खर्च कटौती भए पनि राष्ट्रपति, प्रधानमन्त्री, मन्त्री र पूर्वपदाधिकारीहरूको फजुल खर्चका बारेमा ध्यान दिन नसकेको भन्दै नेपाली कांग्रेसका युवा नेता एवम् पूर्वसांसद रामहरि खतिवडाले आलोचना गरेका छन् । कांग्रेस नेता खतिवडाले बिहीबार संसदमा पेश गरिएको बजेटबारे टिप्पणी गर्दै रोजगारीका विषयमा बजेटले ध्यान दिन नसकेको पनि बताए । यसैगरी ग्रामीण क्षेत्रका युवाहरूका विषयमा ध्यान दिन नसकेको भन्दै चिन्ता पनि जनाएका छन् ।
निजामती कर्मचारीहरूप्रति निर्मम बनेको बजेटले सरकारको लक्ष्य प्राप्त गर्न नसक्ने कांग्रेस नेता खतिवडाले बताए । कोरोना महामारीका कारण नेपाल मात्रै होइन विश्व नै संकट परेका बेला अर्थमन्त्रीजीले २.३ प्रतिशतले आर्थिक वृद्धि हुने बताएको कुरामा आफुले सम्भाव्यता नै नदेखेको पनि जिकिर गरे ।
यस साथै स्वास्थ्य क्षेत्रमा बजेट बढाएको देखिए पनि कार्यान्वयनमा चुनौती रहेको कांग्रेस नेता खतिवडाले बताएका छन् । बजेटले जति नै महत्वकांक्षा राखे पनि राजश्व संकलनमा अर्थमन्त्रीले सोँचअनुसार उठाउन सक्ने गरेर कार्यक्रम र योजना ल्याउन नसकेको उनले बताएका छन् ।
