प्रधानमन्त्री केपी शर्मा ओलीले सरकार गठनको एक वर्षमा आर्थिक सूचकांकहरु सकारात्मक देखिएको बताउनुभएको छ ।
प्रधानमन्त्री ओलीले आज सामाजिक सञ्जाल फेसबुकमा राष्ट्रिय आयोजनाहरुको कामले गति लिएको दाबी गर्नुभयो । गत वर्षको असार २९ गते ओली प्रधानमन्त्री बन्नुभएको थियो ।
ओली सरकार गठन भएको एक वर्ष पूरा भइसकेको छ । संविधान संशोधन, भ्रष्टाचार नियन्त्रण, सेवा सहज गर्नेलगायतका प्रतिबद्धता जनाउँदै कांग्रेस र एमाले नेतृत्वको सरकार गठन भएको थियो ।
उहाँले नागरिकको सेवा प्रवाहमा सरलता ल्याउन महत्वपूर्ण कानुन संशोधन भएको र क्रमैसँगै अनलाइनबाट काम गर्ने प्रचलन बढ्दै गएको बताउनुभयो ।
प्रधानमन्त्रीले सरकारले गर्नुपर्ने काम अझै धेरै रहेको पनि बताउनुभएको छ ।
प्रधानमन्त्री ओलीले सामाजिक सञ्जालमा लेख्नुभएको छ–
हामी सरकारमा आएको एक वर्ष पुग्दै छ । यस बीचमा मुलुकको आर्थिक सूचकांकहरु सकारात्मक देखिएका छन् भने विकासका राष्ट्रिय आयोजनाहरुको कामले गति लिएको छ । टाइमलाइन तोकेर काम गर्ने र नतिजा खोज्ने प्रचलन यसअघि थिएन, अहिले त्यो सुरुवात भएको छ । नागरिकको सेवा प्रवाहमा सरलता ल्याउन महत्वपूर्ण कानुनहरु संशोधन भएका छन् र तिनले क्रमैसँग लाइन होइन अनलाइनबाट काम गर्ने प्रचलन बढ्दै छ । गर्नुपर्ने धेरै कामहरू छन्, सरकारको ध्यान त्यसैमा केन्द्रित छ ।
सबैमा नमन, सबैलाई धन्यवाद !
