काठमाडौं । बाराको सिमरा बजारमा रहेको अल्पाइन मेडिकल कलेज तथा टिचिङ अस्पतालको एम्बुलेन्सबाट ५६ किलो लागुऔषध गाँजा बरामद भएको छ। प्रहरीले ना ४ च ८५९९ नम्बरको एम्बुलेन्समा रहेको गाँजा वीरगञ्ज महानगरपालिका–२७ रामपुर टोलबाट बरामद गरेको जनाएको छ । प्रहरीले एम्बुलेन्सबाट गाँजासहित तीनजनालाई पक्राउ समेत गरेको जिल्ला प्रहरी कार्यालय पर्साले जनाएको छ ।
प्रहरीलाई रामपुर टोलमा गाँजा ओसारपसार हुँदैछ भन्ने सूचना आएको आधारमा प्रहरी टोली खटिएको र सोही क्रममा अल्पाइन अस्पतालको एम्बुलेन्सबाट गाँजा बरामद गरिए हो । पक्राउ परेका व्यक्तिसहित एम्बुलेन्स र गाँजा बुधबार नै पर्सा प्रहरीले सार्वजनिक गरेको छ।
प्रहरीका अनुसार सो गाँजा पर्साको बहुदरमाई नगरपालिका–५ भौराटारतर्फ लैजान लागिएको थियो। गाँजासहित पक्राउ पर्नेमा सर्लाहीको लालबन्दीनगरपालिका १५ बस्ने सन्चार सिंह वाइवाका छोरा अन्दाजी २३ वर्षीय जितबहादुर वाइबा, सोही ठाउँ बस्ने शोभा सिंह वाइबाको छोरा अन्दाजी २२ वर्षीय दिलबहादुर वाइबा र पर्साको बहुदरमाई नगरपालिका ५ भौराटार बस्ने रामईश्वर महतोको छोरा अन्दाजी ३२ वर्षीय हरिशंकर महतो रहेका छन्। सौर्य दैनिक
