सीडीओले ध्यानाकर्षणपत्र लिन नमानेपछि नेपाली कांग्रेस इलामले इमेलमार्फत प्रधानमन्त्रीलाई मंगलबार ध्यानाकर्षणपत्र बुझाएको छ । ध्यानकर्षणपत्रमा विदेशबाट फर्किन चाहनेलाई सहुलियत खर्चमा नेपाल ल्याउनुपर्ने, कोभिड–१९ नियन्त्रणमा सरकारले गरेको खर्चमा व्यापक अनियमितता भएकाले छानबिन गरी दोषीमाथि कारबाही गर्नुपर्ने, कोरोना भाइरसको महामारी रोकथाम तथा नियन्त्रण, व्यवस्थित क्वारेन्टाइन, पीसीआर परीक्षणको दायरा बढाउनुपर्ने, १० अर्बको हिसाबकिताब सार्वजनिक गर्नुपर्नेलगायतका माग राखेर प्रमुख जिल्ला अधिकारीमार्फत प्रधानमन्त्रीलाई ध्यानकर्षणपत्र बुझाउन गएको कांग्रेसको ध्यानकर्षणपत्र प्रमुख जिल्ला अधिकारीले लिन अस्वीकार गरेपछि कांग्रेसले प्रशासन परिसरमै सीडीओविरुद्ध नाराबाजी गरेको थियो । उनीहरूले सीडीओ इलाम मुर्दावाद, गृह प्रशासन मुर्दावाद जस्ता नारा लगाएका थिए ।
नेपाली कांग्रेसले मंगलबार देशका ७७ वटै जिल्लामा ज्ञापनपत्र बुझाउने कार्यक्रमअनुसार कांग्रेस इलामले पनि १६ बुँदे माग राखेर प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाउन जिप्रका गएको थियो । पार्टीका पूर्वजिल्ला सभापति केशव थापासहित कांग्रेसका जिल्लास्तरका नेता तथा कार्यकर्ता, भ्रातृ संस्थाका प्रमुख प्रतिनिधिसहितको टोली प्रशासन पुगेको थियो । प्रशासनमा ध्यानकर्षणपत्र बुझाउन गएको टोली प्रशासन गेटबाहिर करिब १ घन्टासम्म उभिनुपरेको थियो । १ घन्टासम्म पनि सीडीओ तुलसीराम सेढाइँले ध्यानकर्षणपत्र बुझ्न नआएपछि कांग्रेसका नेता–कार्यकर्ता आक्रोशित बनेका थिए ।
उनीहरूले प्रशासनको गेटबाहिर आएर ध्यानकर्षणपत्र नबुझे पनि कमसेकम सभाहलमा आएर बुझिदिन आग्रह गर्दासमेत सीडीओले ध्यानकर्षणपत्र बुझ्न अस्वीकार गरेपछि सीडीओविरुद्ध नाराबाजी गर्नुपरेको कांग्रेस इलामका सचिव खगेन्द्र देवानले बताए । नेपाल समाचारपत्र दैनिक
